Úkimet ekonomıkalyq patrıotızm qaǵıdatyn qatań ustanady – Oljas Bektenov
«Jańa tetikterdiń biri – Otandyq taýar óndirýshilerdiń biryńǵaı tizilimi engizilýde. Tizilimge ónim shyǵaryp otyrǵan, óndiristik qýattary jeterlik, ári qaraı damý úshin áleýeti men josparlary bar naqty kásiporyndardyń ǵana enýi óte mańyzdy. Tizilimge engen kásiporyndar memlekettik qoldaý sharalaryn basym tártippen alatyn bolady. Bul rette olarǵa óndiristi jańǵyrtý, eńbek ónimdiligi men básekege qabilettilikti arttyrý, jalaqyny ósirý boıynsha qarsy mindettemeler qoıylady», - dedi Premer-Mınıstr.
Onyń atap ótýinshe, kásiporyndardyń qyzmetine monıtorıng júrgizý salyq jáne keden qyzmetteri, eńbek ınspektsııalary men basqa da mekemeler tarapynan baqylaý jasalatyn tsıfrlyq skrınıng negizinde júzege asyrylatyn bolady.
«Mundaı skrınıng sybaılas jemqorlyq táýekelderin azaıtý úshin onlaın formatta ótedi. Jalpy úılestirýdi Ónerkásip mınıstrligi júzege asyrady. Úkimet ekonomıkalyq patrıotızm qaǵıdatyn qatań ustanady. Biz qashanda ózimizdiń otandyq óndirýshilerdi qoldaıtyn bolamyz. Bul – árbir ákimniń, árbir mınıstrdiń mindeti. Biz bul jaıly únemi aıtyp júremiz. Ol tek sóz júzinde ǵana emes, naqty is júzinde oryndalýǵa tıis», - dedi ol.
Oljas Bektenov ımportty almastyrý jumystaryn, onyń ishinde ofteık-kelisimsharttar arqyly jandandyra túsý qajettigin basa aıtty.
«Bul otandyq kompanııalarǵa ózderin aldaǵy birneshe jyldar boıyna tapsyrystarmen qamtamasyz etýge, jańa óndiristerdi keńeıtýge jáne ıgerýge múmkindik beredi. Memlekettik satyp alý aıasynda tek qana jergilikti óndirýshilerden satyp alynatyn otandyq taýarlardyń tizbesi aıqyndaldy. Іri munaı-gaz jobalaryndaǵy negizgi jer qoınaýyn paıdalanýshylar qazirdiń ózinde otandyq taýar óndirýshilermen jalpy quny 240 mln dollardy quraıtyn kelisimsharttarǵa qol qoıdy. Bul jumysty jalǵastyratyn bolamyz», - dedi Úkimet basshysy.