Úkimet deńgeıinen ortalyq memlekettik organdarǵa 21 fýnktsııa qaıta bólinedi — zań

<p>ASTANA. KAZINFORM &mdash; Búgin Senattyń jalpy otyrysynda &laquo;Qazaqstan Respýblıkasynyń keıbir zańnamalyq aktilerine memlekettik baqylaý men statıstıka, halyqty qorǵaý júıesin jetildirý, derekterdi basqarý, zańdy tulǵalardy tirkeý jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly&raquo; Zańy eki oqylymda qaralyp, maquldandy.</p>

Zańnyń maqsaty — statıstıka, memlekettik baqylaý, ákimshilik reforma, halyqty áleýmettik qorǵaý salalaryndaǵy zańnamany jetildirý, sondaı-aq artyq zańnamalyq reglamentteýdi boldyrmaý.

«Qaralyp otyrǵan zań memlekettik baqylaý ári statıstıka, derekterdi basqarý, halyqty áleýmettik qorǵaý júıesi máselelerin, sondaı-aq ákimshilik reforma jáne artyq zańnamalyq reglamentteýdi alyp tastaý máselelerin retteıtin zańnamany odan ári jetildirýge baǵyttalǵan. Zań 5 kodeks pen 36 zańǵa ózgerister men tolyqtyrýlar engizýdi kózdeıdi. Memlekettik statıstıka salasyn damytý aıasynda derekterdi jınaý, óńdeý jáne olardy tsıfrlandyrý protsesterin transformatsııalaý, ákimshilik ári balama kózderdi belsendi paıdalaný esebinen respondentterge esepti júktemeni azaıtý, ulttyq derekterdiń sapasyn arttyrý men olardy birneshe ret paıdalaný múmkindigine túzetýler engiziledi», — dedi senator Serik Shaıdarov.

Onyń aıtýynsha, derekterdi basqarýdy damytý salasyn jetildirý aıasynda qazirgi zamanǵy derekterdi óńdeý ortalyqtaryn qurý boıynsha, onyń ishinde baǵdarlamalyq ónimderdi ázirleý jáne satyp alý, derekterdi óńdeý ortalyqtarynyń mártebesin retteý úshin ońaılatylǵan tártipti engizý jolymen zańnamalyq retteýshi quraldar engiziledi. Budan basqa, ókilettikterdi ortalyqsyzdandyrý bóliginde ákimshilik reformany iske asyrý maqsatynda birqatar túzetýler engizildi. Máselen, Úkimet deńgeıinen ortalyq memlekettik organdarǵa 21 fýnktsııany jáne ortalyq memlekettik organdardan jergilikti atqarýshy organdarǵa 12 fýnktsııany qaıta bólý eskerilgen. Sondaı-aq, túzetýlerde onomastıka jáne aımaqtyq rámizderdi bekitý máselelerin retteý qarastyrylǵan.

«Artyq zańnamalyq reglamentteýdi alyp tastaý aıasynda Ádilet mınıstrliginiń quzyretterin alyp tastaý bóliginde, ýákiletti organnyń erejesine aýystyrylatyn birqatar zańdarǵa, sondaı-aq «Quqyqtyq aktiler týraly» Zańnyń talaptaryna sáıkes zańdardyń maqsattaryn, mindetteri men qaǵıdattaryn engizý bóliginde túzetýler engiziledi. Áleýmettik kodekske halyqtyń áleýmettik osal sanattarynyń quqyqtary jónindegi ýákil mártebesin jáne onyń quzyretterin bekitý bóliginde túzetýler engiziledi. Bıýdjet kodeksine qanatqaqty rejımde bloktyq bıýdjetti engizýge qatysty túzetýler engiziledi. Bloktyq bıýdjetti engizý jáne onyń jumysy qaǵıdalaryn, sondaı-aq bloktyq bıýdjetti paıdalanatyn memlekettik organdardyń tizbesin Qazaqstan Respýblıkasynyń Úkimeti aıqyndaıdy», — dedi depýtat.

Ulttyq statıstıka júıesin odan ári damytý máseleleri boıynsha túzetýlerge toqtalsaq, statıstıkalyq jumystardyń úsh jylǵa arnalǵan josparyn bekite otyryp, statıstıkalyq qyzmetti qysqa merzimdi josparlaýdan orta merzimdi josparlaýǵa kóshý qarastyrylǵan.

Ákimshilik reformany iske asyrý aıasynda Úkimettiń birqatar fýnktsııalaryn ortalyq memlekettik organdarǵa berý eskerilgen:

1) Ulttyq ekonomıka mınıstrligine: 
— kásipkerlik sýbektileriniń tizilimin júrgizý jáne paıdalaný qaǵıdalaryn bekitý;

2) Saýda jáne ıntegratsııa mınıstrligine: 
— tańbalaýǵa jatatyn taýarlardyń tizbesin jáne ony engizý kúnin aıqyndaý;

3) Energetıka mınıstrligine: 
— tirkelgen tarıfter men shekti aýktsıondyq baǵalardy aıqyndaý qaǵıdalaryn bekitý jáne basqalar.

Bul rette, ortalyq memlekettik organdar fýnktsııalarynyń bir bóligi jergilikti atqarýshy organdarǵa beriledi, onyń ishinde:

— jeke kásipkerlik sýbektilerine qatysty aqparattandyrý salasynda memlekettik baqylaýdy júzege asyrý;

— baılanys operatorlary kórsetetin baılanys qyzmetteriniń sapasyn baqylaý;

— jeke kásipkerlik sýbektilerine qatysty derbes derekter jáne olardy qorǵaý týraly zańnamanyń saqtalýyn memlekettik baqylaý jáne basqalar.