Úkimet Bıýdjet kodeksi aıasynda qarjy bólýdi shekteý jáne qatań baqylaý úshin pármendi sharalar qabyldamaq

<p>ASTANA. KAZINFORM &mdash; Bıyl jyl sońyna deıin jańa Bıýdjet kodeksiniń jobasy qabyldanady. Bul týraly Úkimet otyrysynda Premer-Mınıstrdiń orynbasary &ndash; Ulttyq ekonomıka mınıstri Nurlan Baıbazarov aıtty.</p>

«Memleket basshysynyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýynda qoıylǵan mindetterdi negizge ala otyryp, ekonomıkalyq bloktyń kelesi baǵyttary boıynsha jumys jalǵastyrylady: bıýdjet saıasatynyń tıimdiligin arttyrý, salyq zańnamasyn jetildirý, ınvestıtsııalyq tartymdylyqty arttyrý, kásipkerlikti damytý. Osy jyldyń sońyna deıin jańa Bıýdjet kodeksiniń jobasy qabyldanady dep kútiledi. Bıýdjet kodeksiniń aıasynda qarjy bólýdi shekteý jáne qatań baqylaý úshin neǵurlym pármendi sharalar qabyldanatyn bolady. Bıýdjet tapshylyǵyn jabý kózderin izdestirý úshin utymdy ótemaqy tetigi engiziledi», - dedi ol.

Onyń atap ótýinshe, jergilikti bıýdjetterdiń jáne kvazımemlekettik sektor sýbektileriniń bos aqshalaı qarajatyn alý úshin ótimdilikti basqarý quralyn odan ary jetildirý josparlanyp otyr. Bul jumys Parlament qabyrǵasynda kodeks jobasyn talqylaý aıasynda júrgiziledi.

«Memlekettik qarjy parametrleriniń turaqtylyǵyn qamtamasyz etý úshin Úkimet bıýdjet erejeleri men orta merzimdi nysanaly baǵdarlardy qoldanýda birizdilikti saqtaıdy. Bıýdjet kiristerin ulǵaıtý maqsatynda salyqtyq ákimshilendirýdi jaqsartý, tsıfrlandyrý, kóleńkeli ekonomıkany qysqartý, salyq bazasyn ulǵaıtý jáne tıimsiz jeńildikterdi qysqartý jónindegi sharalar qabyldanady. Ulttyq qordyń qarajatyn strategııalyq maqsattarǵa qol jetkizý úshin paıdalaný maqsatynda jańa Bıýdjet kodeksinde nysanaly transfertterdi asa mańyzdy obektiler men jalpy ulttyq mańyzy bar jobalardy qarjylandyrýǵa ǵana paıdalaný kózdelgen», - dedi Nurlan Baıbazarov.