Qarmet kompanııasynyń jabdyqtaryn jańartýǵa $1,3 mlrd bólinedi

<p>Úkimette QR Premer-Mınıstri Álıhan Smaıylovtyń tóraǵalyǵymen ótken keńeste Qarmet kompanııasynyń aǵymdaǵy jumysy men kásiporyndy odan ári damytýdyń ózekti máseleleri qaraldy, dep habarlaıdy <a href="https://primeminister.kz/news/qarmet-ondiristi-keshendi-damytu-zhane-ekologiyalyk-buzushylyktardy-zhoyu-boyynsha-kezen-kezenmen-zhumys-zhurgizedi-26684" target="_blank" rel="noopener">primeminister.kz</a>.</p>

Ortalyq memlekettik organdardyń birinshi basshylary jáne jańa ınvestordyń qatysýymen kásiporynnyń operatsııalyq protsesterin turaqtandyrý, ony qajetti shıkizatpen qamtamasyz etý, sondaı-aq birqatar quqyqtyq rásimderdi júrgizý sharalary talqylandy.

Odan bólek, kombınat jabdyqtaryn jańǵyrtýdy, zamanaýı óndiris tehnologııalaryn engizýdi jáne ónerkásiptik qaýipsizdik standarttaryn arttyrýdy kózdeıtin ınvestıtsııalyq baǵdarlamany iske asyrý máselesi qaraldy.

Atap aıtqanda, birinshi kezeńde osy maqsatqa shamamen $1,3 mlrd bólinedi.

Premer-Mınıstr kásiporyn jumysshylary aldyndaǵy barlyq mindettemelerdi ýaqtyly oryndaý qajettigin atap ótti.

Úkimet basshysy osyǵan oraı, óndiristi odan ári serpindi damytýdyń, shyǵarylatyn ónim kólemin ulǵaıtýdyń jáne anyqtalǵan ekologııalyq zańnama talaptaryn buzýshylyqtardy kezeń-kezeńimen joıýdyń mańyzdylyǵyn atap ótti.

Foto: primeminister.kz

Talqylaý qorytyndysy boıynsha Álıhan Smaıylov ortalyq memlekettik organdarǵa aǵymdaǵy máselelerdi sheshýde kásiporynǵa qajetti qoldaý kórsetýdi jáne ınvestormen birlesip, Qarmet-ti damytýdyń árbir baǵyty boıynsha naqty is-qımyl josparyn ázirleýdi tapsyrdy.