Úkimet BQO-daǵy elektr jelilerin qalpyna keltirýge 1,1 mlrd teńgeden astam qarjy bóldi

<p>ASTANA. KAZINFORM &ndash;&nbsp;QR Úkimetiniń qaýlysymen Batys Qazaqstan oblysyndaǵy alapat sý tasqynynan keıin áýedegi&nbsp;elektr jelilerin qalpyna keltirý úshin tótenshe rezervinen 1,1 mlrd teńgeden astam qarajat bólindi. Bul týraly Úkimettiń baspasóz qyzmeti málimdedi.</p>

Qarajat tabıǵı sıpattaǵy TJ saldaryn joıý sheńberinde óńirlik bıýdjetke aýdarylady. BQO ákimdigi QR Energetıka mınıstrligine 1 jeltoqsanǵa deıin qarajattyń maqsatty paıdalanylǵany jóninde esep berýge tıis.

Qalpyna keltirý jumystary kelesi ýchaskelerde júrgiziledi: 1. Báıterek aýdanyndaǵy Shalǵaı – Talovaıa; 2. Keńtúbek (Grıgorevka) – Bórli aýdanyndaǵy Aleksandrovka; 3. Shyńǵyrlaý – Shyńǵyrlaý aýdanyndaǵy Aşysaı (Myrzagora).

Eske sala keteıik, elimizde bolǵan alapat sý tasqyny saldarynan ınjenerlik, áleýmettik ınfraqurylym jáne joldar búlingen bolatyn. Atap aıtqanda, 2,3 myńnan astam elektrmen jabdyqtaý tiregi qırap, 54 shaqyrym jeli úzilgen. Qazirgi tańda onyń 40%-dan astamy qalpyna keltirildi, jumys jaz aılarynda qarqyndy jalǵasyp jatyr.

Sondaı-aq buǵan deıin Qostanaı oblysynda elektr jelilerin qalpyna keltirýge tótenshe rezervinen 1,3 mlrd teńgeden astam qarajat bólý týraly Úkimet qaýlysy qabyldanǵan bolatyn. Qalpyna keltirý jumystary Arqalyq qalasy, Amangeldi jáne Jangeldi aýdandaryn qamtıdy.

Zardap shekken azamattarǵa keltirilgen zalaldy óteý jáne ınfraqurylymnyń barlyq túrin qalpyna keltirý máseleleri Úkimettiń qatań baqylaýynda.