Úkimet basshysy óńirlik elektr jelilerin damytý jumystarynan shettegen ákimderdi synady

<p>ASTANA. KAZINFORM &ndash; Ákimdikter óńirlik elektr jelilerin damytý jumystarynan shettep qaldy. Bul týraly Úkimet otyrysynda Premer-Mınıstr Álıhan Smaıylov aıtty.</p>

«Batys energetıka aımaǵyn Biryńǵaı ulttyq júıege qosý máselesi sheshimin tappaı otyr. Sondyqtan, «KEGOS» kompanııasy osy jyly «Aqtóbe-Atyraý» elektr berý jelisin salý jumystaryn bastaýy kerek. Búginde Energetıka mınıstrligi jańa gaz generatsııalaý obektilerin salý oryndaryn aıqyndady. Olar – Qyzylorda, Shymkent, Taraz, Aqtaý, Atyraý jáne Aqtóbe qalalary», - dedi Álıhan Smaıylov.

Premer-Mınıstr osy jobalardy iske asyrý úshin aqpan aıynyń sońyna deıin qajetti rásimderdi bastaý qajettigin basa aıtty.

«Ákimdikter óńirlik elektr jelilerin damytý jumystarynan shettep qaldy. Óńirlik elektr jelilik kompanııalary ózderiniń ınvestıtsııalyq baǵdarlamalarynyń jasalýy men oryndalýyn baqylap otyrǵan joq. Buǵan jeltoqsan aıynda elimizdiń soltústik óńirderinde elektr qýatynyń jappaı óship qalýy dálel. Jergilikti atqarýshy organdar óńirlik elektr jelilik kompanııalardyń qyzmetin úılestirýdi qamtamasyz etýi tıis», - dedi Úkimet basshysy.