Úkimet basshysy múgedek jandardy eńbekpen qamtý boıynsha mınıstr men ákimderge mindetter júktedi
«Múgedektigi bar adamdar úshin arnaıy bos jumys oryndary bar elektrondyq eńbek bırjasy jumys isteıdi. Osyndaı jumys oryndaryna memleket sýbsıdııa berip otyr. Alaıda, eńbekke jaramdy múgedektigi bar jandardyń tek 39%-y ǵana jumys taba alady. Eńbek jáne halyqty áleýmettik qorǵaý mınıstrligi ákimdikter jáne bıznespen birlesip, osy problemaǵa erekshe nazar aýdarýy qajet. Eger múgedektigi bar adam jumys isteýge qabiletti bolsa jáne jumys istegisi kelse, oǵan mindetti túrde kómektesý kerek», - dedi Oljas Bektenov Úkimet otyrysynda.
Odan ári Premer-mınıstr ınvataksı máselesin kóterdi.
«Elimizde 150-ge jýyq ınvataksı qyzmeti jumys isteıdi. Oǵan suranyspen qatar kezek te óte kóp. Sondyqtan ákimdikter ınvataksı qyzmetterin qoldap, avtokólik parkin arttyrýǵa jaǵdaı jasaýy qajet», - dep toqtaldy O. Bektenov.
Buǵan deıin Premer-mınıstr ákimder men mınıstrlerge múgedek jandardyń máselesin sheship, jaǵdaı jasaýda shtattan tys keńesshimen jumys isteý ıdeıasyn usyndy.
Odan bólek, Úkimet basshysy múgedek jandar úshin jasalyp jatqan jumystardy mardymsyz dep baǵalady.
Aıta ketsek, memlekettik organdarǵa jyl basynan beri múgedek jandardan 16 myńnan astam aryz-shaǵym túsken.