Úkimet basshysy bıyl mol astyq jınaýǵa ne yqpal etkenin aıtty

<p>ASTANA. KAZINFORM &ndash; Premer-Mınıstr Oljas Bektenov bızneske qolaıly jaǵdaı jasaý boıynsha atqarylyp jatqan is-sharalar jaıynda aıtyp berdi.</p>

«Kásipkerlikti qoldaý is-sharalary jetildirilip jatyr. Byltyrdan beri engizilgen «bárin basynan bastap retteý» qaǵıdasyna sáıkes, bızneske qatysty 10 myńnan astam talap joıyldy. Olar jańa retteý saıasatynyń bazalyq talaptaryna sáıkes kelmedi. Osy tektes jumys óńirlik deńgeıde de iske asyrylyp jatyr», - dedi O. Bektenov elordadaǵy «Adal azamat. Adal eńbek. Adal bıznes» forýmynda.

Bul turǵyda ol kásipkerler aldyndaǵy kedergiler áli de bar ekenin, sondyqtan bıznes jumysyn ońtaıly etýge arnalǵan is-sharalar jalǵasatynyn atap ótti.

«Qazir shaǵyn jáne orta bıznestiń el ekonomıkasyndaǵy úlesi 37 paıyzǵa jýyq. 4 mln-nan astam qazaqstandyq bıznes salasynda qyzmet etip júr. Tek ótken jarty jylda ShOB sýbektileri 34 trln teńgeniń ónimin shyǵardy, ıaǵnı ósim 20 paıyzǵa jýyq boldy», - dedi Úkimet basshysy.

Onyń aıtýynsha, memlekettik qoldaýdyń tıimdiligi arqasynda agroónerkásip kesheni salasynda eleýli ósim boldy. Bıyl kóktemde egin egý men kúzgi egin oraǵy naýqanyna jeńildetilgen nesıe berý 2,5 esege artyp, 580 mlrd teńgeni qurady. Osynyń arqasynda tyńaıtqyshtar kólemi artyp, tuqym sapasy jaqsaryp, tehnıka parki jańartylyp, zııankestermen kúres jumystary kúsheıtildi.

«Munyń nátıjesinde Qazaqstan 26 mln tonnadan astam astyq jınady. Bul óz kezeginde keıingi 10 jyldaǵy úzdik nátıje. Orta eseppen gektarynan shamamen 16 tsentnerden ónim alyndy. Keıbir alqaptardan dıqandar 40-50 tsentnerden ónim jınady. Osyndaı jumystardy shaǵyn jáne orta bıznes salasynda da júrgizý qajet. Memlekettik qoldaý bıznestiń de tıisti mindetterdi oryndaýyn talap etedi. Osy oraıda ishki naryqty sapaly ári qymbat emes ónimmen qamtamasyz etý mindeti bar. Sondaı-aq óńdeý deńgeıin arttyrý, turaqty jumys oryndaryn qurý jáne eksport baǵytynda bıznesti kezeń-kezeńimen irilendirý jumystaryna nazar aýdarýy kerek», - dedi Premer-Mınıstr.

Budan buryn habarlanǵandaı, forým barysynda Premer-Mınıstr elge janashyrlyq tanytqan kásipkerlerge alǵys aıtty.

Jaqynda QR Aýyl sharýashylyǵy vıtse-mınıstri Azat Sultanov bıyl 26,6 mln tonna astyq jınalǵanyn atap ótti.