Úkimet basshysy: 1 qyrkúıekke deıin jylý ortalyqtary otynmen qamtamasyz etilsin

<p>ASTANA. KAZINFORM &ndash; Úkimet basshysy Oljas Bektenov aldaǵy jylytý maýsymyna daıyndyq barysynyń baıaý júrip jatqanyn aıta kele, birqatar tapsyrma berdi.</p>

«Energetıka, Ónerkásip jáne qurylys mınıstrlikteri óńir ákimdikterimen birge jylý kózderi men jelilerine jóndeý jumystarynyń ýaqytyly ári sapaly júrgizilýine baqylaýdy kúsheıtsin. Ekinshiden, atalǵan eki mınıstrlik pen óńir ákimdikteri 1 qyrkúıekke deıin barlyq jylý-elektr ortalyqtary men qazandyqtaryn otynmen qamtamasyz etsin. Úshinshiden, 15 qyrkúıekke deıin ortalyq, soltústik jáne shyǵys óńirlerde, al qalǵan óńirlerde 15 qazanǵa deıin barlyq ınjenerlik ınfraqurylym men turǵyn úı-kommýnaldyq sharýashylyq obektileriniń jańa jylytý maýsymyna tolyq daıyndyǵyn qamtamasyz etińizder», - dedi Oljas Bektenov Úkimet otyrysynda.

Buǵan deıin Premer-Mınıstr jylý obektilerin jóndeý jumystary merziminen keshigip jatqanyn synǵa alǵan edi. 

Óz kezeginde Energetıka mınıstri Almasadam Sátqalıev jylytý maýsymyna daıyndyqty áli bastamaǵan kásiporyndardy atady.