Úkimet balalardy qaýipti aýrýlarǵa qarsy ımmýndaýǵa 5,8 mlrd teńgeden astam qarjy bóldi

<p>ASTANA. KAZINFORM &ndash; Qazaqstan Premer-Mınıstri Oljas Bektenov elimizde qolaıly epıdemıologııalyq jaǵdaıdy qamtamasyz etý jáne balalardyń densaýlyǵyn qorǵaý úshin vaktsınalar men medıtsınalyq buıymdardyń qosymsha kólemin satyp alýǵa qarajat bólý týraly qaýlyǵa qol qoıdy. Bul týraly Úkimettiń baspasóz qyzmeti habarlady.</p>

Ulttyq egý kúntizbesi sheńberinde ýaqytynda ekpe salynbaı qalǵan 18 jasqa deıingi balalardy ımmýndaýǵa Úkimet rezervinen 5 832 377 600 (bes mıllıard segiz júz otyz eki mıllıon úsh júz jetpis jeti myń alty júz) teńge bólinedi.

Densaýlyq saqtaý mınıstrligi júrgizgen taldaý nátıjesinde Qazaqstanda ekpe almaǵan 800 myńnan astam bala anyqtaldy. Kókjótel, dıfterııa, A jáne V vırýsty gepatıtteri, qyzylsha, qyzamyq, sirespe, polıomıelıt, parotıt jáne gemofıldi ınfektsııa sııaqty qaýipti juqpaly aýrýlarǵa qarsy tolyqtyra ımmýndaý júrgiziledi. Qarajat oblystardyń, respýblıkalyq mańyzy bar qalalardyń jáne astananyń ákimdikterine 747 720 doza vaktsına men 542 592 birlik shprıts satyp alýǵa beriletin aǵymdaǵy nysanaly transfertter túrinde aýdarylady. Al Shyǵys Qazaqstan oblysynda balalardy qolda bar preparattar kólemi esebinen tolyqtyra vaktsınalaý josparlanyp otyr.

Densaýlyq saqtaý mınıstrliginiń málimetinshe, Qazaqstanda qyzylsha boıynsha epıdemıologııalyq jaǵdaı turaqtanyp keledi. Sońǵy 2 aıda syrqattanýshylyq deńgeıi 32%-ǵa tómendedi. Qosymsha jappaı ımmýndaý aıasynda shamamen 1,3 mln adam ekpe aldy, bul vaktsına alýǵa jatatyn halyqtyń 91%-y. Sonymen qatar basqa da vaktsınamen basqarylatyn ınfektsııalarmen syrqattanýshylyq jaǵdaılarynyń artqany baıqalady. Máselen, 2023 jyly kókjótel boıynsha keri dınamıka tirkeldi, bul rette naýqastardyń 91%-y – ekpe almaǵan balalar. Sondaı-aq qyzamyq, epıdemııalyq parotıt jáne A vırýsty gepatıtinde de ósim tirkeldi.

Halyq arasynda qaýipti ınfektsııalarmen syrqattanýshylyqtyń ósýine jol bermeý úshin Úkimet basshysy Oljas Bektenov Densaýlyq saqtaý mınıstrligi men ákimdikterge ımmýndaýdy ýaqytyly júrgizý máselesin jáne árbir óńirdegi epıdemıologııalyq jaǵdaıdy erekshe baqylaýǵa alýdy tapsyrdy.