Úkimet Astana aglomeratsııasyn damytýdyń keshendi josparyn maquldady
«Qalaǵa jaqyn mańdaǵy eldi-mekenderde halyq sanynyń kúrt ósýi men elordaǵa kúndelikti kelip-ketetin adamdardyń legi aglomeratsııanyń negizgi problemalary bolyp tabylady. Bul Astana qalasynyń ınfraqurylymy men ekologııasyna jáne qaýipsizdigine túsetin júktemeni edáýir arttyrady. Adamdar elordaǵa jaqyn mańda turǵysy keledi. Ony túsinýge bolady. Alaıda, mundaı kóshi-qon eńbek naryǵyna áserin tıgizedi, oblysta jumyssyzdyqtyń ósýine yqpal etedi. Sondyqtan, atalǵan problemalardy sheshý úshin aýqymdy jumys jasaýǵa týra keledi. Usynylyp otyrǵan keshendi jospar osy baǵyttaǵy negizgi baǵdarlamalyq qujat bolady», — dedi Premer-Mınıstr Oljas Bektenov atalǵan jobany talqylaý barysynda.
Onyń aıtýynsha, qala mańyndaǵy aýyldardyń sýmen qamtamasyz etý, sý burý, elektrmen jabdyqtaý, joldardyń jaı-kúıi sııaqty ózderiniń problemalary da barshylyq.
«Bul rette Jospardy iske asyrý osyndaı ózekti problemalardyń da sheshimin tabýǵa tıis dep sanaımyn. Sonymen qatar, elorda irgesindegi aýyldarda turaqty jumys oryndaryn ashý qajet. Astana qalasy aglomeratsııanyń ózegi retinde irgeles jatqan aýmaqtardyń ornyqty damýyna negiz bolady. Bul elorda men oǵan jaqyn mańdaǵy eldi mekenderdiń turmys deńgeıiniń arasyndaǵy teńgerimsizdikti azaıtýǵa múmkindik beredi», — dedi Úkimet basshysy.
Premer-Mınıstrdiń sózine qaraǵanda, keshendi jospardy iske asyrý kezinde kólik-kommýnıkatsııa, saýda-logıstıka, ınjenerlik-kommýnaldyq jáne áleýmettik ınfraqurylymnyń birtutas keshenin qurý úshin ınvestıtsııalar tartýǵa qolaıly jaǵdaı jasaý kerek. Aglomeratsııanyń negizgi maqsaty da osy bolýǵa tıis. Sondaı-aq, 45 aýyldyq eldi mekenniń árqaısysyna ózindik ekonomıkalyq erekshelik berý qajet.
«Sol kezde aýyldarmen qatar, Astana qalasy da mal jáne ósimdik sharýashylyǵynyń, qurylys ındýstrııasynyń, sondaı-aq basqa da salalardyń qajetti ónimderimen ózin-ózi qamtamasyz etýge qol jetkize alady. Áli kúnge deıin elorda aınalasynda azyq-túlik beldeýin qurý máselesi tolyǵymen sheshilgen joq. Ony moıyndaý kerek. Ony osy eldi mekenderde jasaýǵa bolady. Jalpy, barlyq is-sharalardy jaýapty ári sapaly iske asyrý elorda men qala mańyndaǵy aımaqtardyń ekonomıkalyq damý tıimdiligin arttyrýǵa múmkindik beredi», — dedi ol.
Osydan keıin Úkimet basshysy áriptesterin usynylǵan jobany maquldaýǵa jáne tıisti qaýlyǵa daýys berýge shaqyrdy. Osylaısha, Úkimet músheleri qujatty maquldady.
«Aqmola oblysy men Astana qalasynyń ákimdikteri múddeli memlekettik organdarmen birlesip, keshendi jospardaǵy is-sharalardyń ýaqtyly jáne sapaly oryndalýyn qamtamasyz etýi qajet. Qarjy mınıstrligine ákimdiktermen jáne múddeli memlekettik organdarmen birlesip, Jospardyń is-sharalaryn ýaqtyly qarjylandyrýdy qamtamasyz etýdi tapsyramy», — dedi Oljas Bektenov.