Úkim ózgerissiz qaldy: Sot Nurlan Másimovtiń appelıatsııalyq shaǵymyn qanaǵattandyrmady

<p>Nurlan Másimovke qatysty úkim tamyz aıynda jarııalanyp, oǵan sáıkes kúdikti múlkin tárkileý jáne memlekettik qyzmette laýazymdy qyzmet atqarý quqynan ómir boıy aıyrý arqyly 10 jylǵa bas bostandyǵyna shekteý jazasyna ilikken edi. Alaıda, sottalýshy sot sheshimimen kelispeı appelıatsııaǵa bergen bolatyn, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Sottalýshy Másimov pen Sırazıdımov jáne olardyń qorǵaýshylary appelıatsııalyq shaǵymdarynda qylmystyq is júrgizý jaıynda aıtarlyqtaı buzýshylyqtar bolǵanyna baılanysty úkimdi joıyp, isti qaıta quramda jańadan qaraý úshin birinshi satydaǵy sotqa jiberýdi suraǵan edi.

Sottalýshy Evkovıch qylmys arqyly keltirilgen shyǵyndy, sonymen qatar protsessýaldyq shyǵyndy tolyqtaı ótedi. Sondyqtan ol úkimdi ózgertip, bas bostandyǵymen baılanysty emes jaza taǵaıyndaýdy ótindi.

1 jeltoqsanda Pavlodar oblystyq sotynyń qylmystyq ister jónindegi sot alqasy appelıatsııalyq shaǵymǵa qatysty sheshim shyǵardy. Másimov pen Sırazıdımovke qatysty úkim ózgerissiz qaldy, appelıatsııalyq shaǵym qanaǵattandyrylmady.

Evgenıı Evkovıchtiń kinásin moıyndaýyna jáne shyǵyndy tolyq kólemine óteýine baılanysty jaza merzimi 5 jylǵa deıin bas bostandyǵynan aıyrýǵa tómendetildi.

«Pavlodar oblystyq polıtsııa departamentiniń shyǵyn somasyn óndirip alý týraly azamattyq talap-aryzy boıynsha óndiris onyń tolyq kólemde ótelýine baılanysty toqtatyldy. Qaýly zańdy kúshine endi», - dep atap ótedi oblystyq sottyń baspasóz qyzmetinen.

Eske sala ketsek, ótken jyly 3 maýsymda Pavlodar oblystyq Polıtsııa departamentiniń burynǵy bastyǵy Nurlan Másimovke izdeý jarııalanǵan edi.

Keıin Sybaılas jemqorlyqqa qarsy is-qımyl agenttigi Nurlan Másimov týraly aqparat bergen adamǵa 12 mln teńgege deıin syıaqy baryn habarlady.

2022 jyly 13 shilde de Ultyq qaýipsizdik komıtetiniń ókilderi Nurlan Másimovti Reseımen shekarada ustady.

Al bıyl 10 tamyzda Pavlodar oblysy polıtsııa departamentiniń burynǵy bastyǵy Nurlan Másimov 10 jylǵa sottaǵan edi. Sottalýshylar M. jáne S., QK 366, 368,189-baptary boıynsha kinásin moıyndamady jáne aqtaýdy surady.