UQK Aýǵanstanda bılik aýysqanda qalaı áreket etti

NUR-SULTAN. QazAqparat –Aýǵanstanda bılik aýysyp, eldegi ahýaldy Talıban rejımi baqylaýyna alǵan kezde olarman alǵashqy baılanysty barlaýshylar ornatqan. QR Ulttyq qaýipsizdik komıtetiniń 30 jyldyǵyna arnap túsirilgen fılmde komıtet tóraǵasynyń orynbasary – Syrtqy barlaý qyzmetiniń dırektory Ǵabıt Baıjanov sol bir jaýapty kezeń týraly qysqasha málimet aıtady, dep habarlaıdy QazAqparat tilshisi.

«Keıingi birneshe operatsııa Aýǵanstandaǵy sońǵy ózgerister kezinde ótti. Ol kezde tek barlaýshylar ǵana jumys istedi. Olar búkil adamdardy jınap, qaýipsizdigin qamtamasyz etti. Talıbannyń jańa bıligimen kelisimderge kelip, baılanystar ornatty. Keıin ózge organ qyzmetkerlerin resmı túrde nagradtap jatty. Al bizdiń mamandar eleýsiz, jabyq jarlyqpen marapattaldy. Olardyń bul eńbegin jalpaq jurt bilmegenimen, qandaı jaýapty is atqarǵandaryn ózderi biledi ǵoı. Barlaýshy úshin eń úlken marapat – halqynyń, eliniń amandyǵy», - dedi komıtet ókili.

Sondaı-aq, fılmde Qarsy barlaý qyzmetiniń ardageri Adamǵalı Naqyspekov 2000 jyly qorǵanys salasyndaǵy qupııany ózge eldiń azamatyna alyp bermek bolǵan azamatty qalaı qolǵa túsirgenderin eske alady.

«2000 jyly shetel azamaty Qazaqstannyń aýmaǵynda jasyryn áreket etpek bolǵan. Buqaralyq aqparat quralynyń ókili retinde búrkemelenip, áskerı buıym týraly qupııa qujatty alǵysy keldi. Sol kezde ol buıymnyń derekteri qupııa bolyp sanalatyn. Bizdiń bir azamatqa shyǵyp, tanysqan. Bizdiń azamat qajetti qujatty taýyp bere alatynyn aıtyp, kelisken. Solaısha ol aqparat alýdyń joldaryn izdeı bastady. Sóıtip júrip taǵy bir Qazaqstan azamatyna jolyǵady. Ol bizdiń organnyń qupııa kómekshisi bolyp shyǵady. Birden bizge habarlady. Ári qaraı oıyn bizdiń baqylaýymyzben júrdi. Búkil málimetter jınalyp, jasyryn áreket etýshilerdi qylmystyq jazaǵa tartýǵa bolatyny týraly baǵa berildi. Osylaısha ekeýine bultartpaý sharasy qoldanyldy. Shetel azamaty 10 jylǵa, óz azamatymyz otanǵa opasyzdyq jasaǵany úshin 13 jylǵa sottaldy», -dedi Adamǵalı Naqyspekov.

Aıta keteıik, búgin UQK-niń qurylǵanyna 30 jyl toldy.