Úkimettiń májilis zaly kınoteatrǵa aınaldy

ASTANA. QazAqparat - Úkimettiń búgingi otyrysynda QR Mádenıet jáne sport mınıstri Arystanbek Muxamedıuly otandyq kınematografııa salasynda atqarylǵan jumys boıynsha esep berdi. Jarty saǵattyń ishinde mınıstr ondaǵan fılmniń treılerin kórsetip úlgerdi, dep xabarlaıdy QazAqparat tilshisi.

Muxamedıulynyń sózine qaraǵanda, búgingi kınoprokatta otandyq fılmderdiń úlesi 6 paıyzdy qurap otyr. Al kınoteatrlarda jınalatyn qarjynyń jalpy kólemi 10 mlrd. teńgeni qurasa, atalǵan qarajattyń 7 paıyzy qazaqstandyq fılmderge tıesili. «Sońǵy úsh jyldyń ishinde mınıstrliktiń qoldaýymen 100-ge jýyq ulttyq fılmder túsirildi. Búginde 40-tan astam fılm túsirilip jatyr», - deıdi mınıstr.

Onyń aıtýynsha, qazirgi kezde kóptegen memleketter óz kınolaryn álemdik naryqtarǵa shyǵarý arqyly ulttyń mádenıetin, tarıxyn jáne salt-dástúrin keńinen nasıxattap jatady. Túptiń túbinde memlekettiń xalyqarylyq dárejede ataq-abyroıy kóteriledi. Osy oraıda mınıstr Reseı Federatsııasymen birlesip túsirilgen «28 panfılovshylar» fılmin ekshe atap ótti. Atalǵan kartına ótken jyldyń úzdik fılmi retinde tanylyp, túsirý jumystaryna jumsalǵan shyǵyndy tolyǵymen aqtap shyqty.

Baýyrjan Momyshulynyń sózimen bastalatyn fılmde eki mergen qazaq azamatynyń maıdandaǵy erligi jan-jaqty kórsetilgen. Prokat quqyǵyn golıvýdtyq «Universal» satyp aldy. Osy ýaqytqa deıin ony Eýropa men Kanadada kórsetti. Aldaǵy ýaqytta Japonııa, Koreıa, Ulybrıtanııa men Frantsııada prokatqa shyǵarý josparlanyp otyr. Budan bólek, «Marko Polonyń Jibek joly», «Ámire» jáne taǵy basqa xalyqaralyq jobalar bar. «Koshbasshynyń joly» atty fılm de Reseı, Qytaı, Frantsııa, Gonkong pen Gretsııada kórsetildi. Aldaǵy ýaqytta atalǵan fılm xalyqaralyq áýe reısterinde kórsetiledi.

«Biz qazaqtyń birtýar azamattary arqyly xalqymyzdyń ulttyq bolymysyn, mádenıetin jáne salt-dástúrin álem elderine pash etýimiz kerek. Sheteldik kórermen de soǵan qatty qyzyǵady», - deıdi Muxamedıuly.

Mınıstr ishki prokattaǵy úzdik fılmderdi de erekshe atap ótti. Solardyń ishinde «Anaǵa aparar jol», «Qunanbaı», «Amanat», «Almas qylysh», «Qazaq eli» sııaqty kórkem jáne anımatsııalyq fılmder bar.