Úkimettik emes uıymdarǵa qatysty zańnyń basty jańalyǵy nede

ASTANA. QazAqparat - Búgin QR Senatynyń mádenı-áleýmettik damý jáne ǵylym komıteti úkimettik emes uıymdarǵa qatysty zań jobasyn qarap shyqty, dep xabarlaıdy QazAqparat tilshisi.

QR Din isteri jáne azamattyq qoǵam vıtse-mınıstri Abzal Núkenovtiń aıtýynsha, zań jobasyna memlekettik tapsyrystyń tıimdiligin arttyrý boıynsha birqatar usynystar enip otyr. Sebebi búginde respýblıka boıynsha memlekettik tapsyrystyń kólemi aıtarlyqtaı artty. Bıyl qoǵamdyq mańyzy bar bastamalarǵa 19,3 mlrd teńge qarastyrylǵan. Osydan eki jyl buryn ǵana atalǵan kórsetkish eki ese az boldy.

"Qazirgi kezde memlekettik organdar tarapynan memlekettik áleýmettik tapsyrystyń taqyryptary men somalaryn qalyptastyrǵanda túrli tásilderdi qoldanady. Biraq maqsatty toptardyń qajettilikteri eskerilmeı jatady. Sol sebepti zań jobasy aıasynda "memlekettik áleýmettik tapsyrysty qalyptastyrý" degen arnaıy túsinikti engizip otyrmyz. Úkimettik emes uıymdar men qarapaıym azamattar óz usynystaryn jiberip, memlekettik áleýmettik tapsyrysty qalyptastyrýǵa atsalysa alady. Bul - mańyzdy jańalyqtardyń biri. Ekinshiden, "memlekettik áleýmettik tapsyrys nátıjelerin baǵalaý" degen túsinik engiziledi. Sonyń arqasynda xalyqtyń kórsetilgen qyzmet sapasyna qanaǵattaný deńgeıi men jobanyń tıimdiligin anyqtaýǵa bolady. Joba aıaqtalǵannan keıin tikeleı baǵalaý júrgiziledi. Birinshi kezekte aqparat jınaqtaý, ekinshi kezekte sol jınalǵannan aqparatty taldaý men saraptaýdy usynamyz", - deıdi A.Núkenov.

Budan bólek, zań jobasynda memlekettik áleýmettik tapsyrystyń sapasyna, mazmunyna, sharttaryna biryńǵaı talaptardy, sondaı-aq, áleýmettik jobalardy baǵalaý kórsetkishterin engizý qarastyrylǵan. "Mınıstrlik úkimettik emes uıymdarmen birlesip, memlekettik áleýmettik tapsyrys aıasyndaǵy barlyq qyzmetterdi taldady. Búginde biz birneshe memlekettik tapsyrystyń qyzmet túrin anyqtap otyrmyz. Sonyń ishinde konsýltatsııalyq, zertteý, aqparattyq-ádistemelik, resýrstyq ortalyqtardyń jumysyn uıymdastyrý, sharalar ótkizý sııaqty qyzmetter bar. Qazir tıisti qujattar ázirlenip jatyr. Sosyn syıaqylar men granttardy berý júıesin jaqsartý josparlanǵan. Endi, konkýrsqa qatysqan, biraq syıaqy almaǵan úkimettik emes uıymdar kelesi jyly da syıaqy alýǵa ótinim bere alady. Sondaı-aq, jergilikti atqarýshy organdarǵa úkimettik emes uıymdar úshin granttar usyný quzireti beriledi. Bul- kópten beri kóterilip kele jatqan másele. Buıyrsa, zań jobasy aıasynda sheshiledi. Jalpy, syıaqylar men granttardy berý baǵyttary naqtylanady", - dep atap kórsetti A.Núkenov.

Aıta keteıik, búgingi otyrysta komıtet músheleri atalǵan zań jobasyn qoldap, Senattyń jalpy otyrysyna shyǵarýǵa ruqsat berdi. Al komıtet tóraıymy Birǵanym Áıtimova ózge ult depýtattarynyń memlekettik tildi meńgerýge den qoıǵanyn da jetkizdi.