Úkimettik emes uıymdarǵa arnalǵan memlekettik grant konkýrsy bastaldy

ASTANA. QazAqparat – Búgin úkimettik emes uıymdarǵa arnalǵan memlekettik grant berý konkýrsy bastaldy. Baıqaý týraly Aqparat jáne qoǵamdyq damý mınıstrligi Azamattyq bastamalardy qoldaý ortalyǵynyń basqarma tóraǵasy Ǵalym Qurman aıtyp berdi, dep habarlaıdy QazAqparat tilshisi.

«Úkimettik emes uıymdarǵa 1 mlrd 292 mln teńge memlekettik grant qarjysy qarastyrylyp otyr. Memlekettik grant konkýrsy búgin bastaldy jáne ol 6 baǵyt boıynsha ótedi. Grant oryndalý merzimine qaraı úshke bólinedi: qysqa, orta jáne uzaq merzimdi. Onyń ishinde qysqa jáne orta merzim boıynsha ótinish 1 aqpanǵa deıin, al uzaq merzimdi grantqa ótinish 15 aqpanǵa deıin qabyldanady», - dedi Ǵalym Qurman mınıstrliktiń Instagram paraqshasynda ótken tikeleı efır barysynda.

Bıyl ÚEU-ǵa 47 memlekettik grant qarastyrylyp otyr. Onyń 22-si qysqa merzimdi, 16-sy orta jáne 9-y uzaq merzimdi joba.

«Baıqaýdy ótkizýde biz operator rólin atqaramyz. Memlekettik granttardy bólýdi táýelsiz sarapshylar baǵalap, anyqtaıdy. Konkýrs boıynsha baǵalaýdyń óz krıterııleri bar. Baıqaýǵa barlyq óńirden úkimettik emes uıymdary qatysa alady», - deıdi spıker.

Úkimettik emes uıymdarǵa memlekettik grant myna 6 baǵyt boıynsha bólinedi:

1) halyqtyń áleýmettik turǵydan osal toptaryn qoldaý;

2) azamattyq qoǵamdy damytýǵa, onyń ishinde úkimettik emes uıymdar qyzmetiniń tıimdiligin arttyrýǵa járdemdesý;

3) azamattar men uıymdardyń quqyqtaryn, zańdy múddelerin qorǵaý;

4) qoǵamdyq kelisimdi jáne jalpyulttyq birlikti nyǵaıtý;

5) jastar saıasaty men balalar bastamalaryn qoldaý;

6) otbasylyq-demografııalyq jáne genderlik máselelerdi sheshýge járdemdesý.

Qatysýshylar ótinimdi qaǵaz nemese elektrondy túrde Qazaqstan Respýblıkasy, 010000, Astana q., Esil aýdany, Qabanbaı batyr dańǵyly, 11/5, «Nurly Orda» BO, 5-qabat, 504/3 kabınetke jáne [e-mail] elektrondyq poshtasyna joldaýy qajet.