Úkimettik emes uıymdar mentaldy densaýlyq salasyndaǵy quqyq qorǵaý deńgeıin baǵalaýda

ALMATY. Maýsymnyń 15-i. QazAqparat /Názıra Eleýhan/ - «Aman-saýlyq» qoǵamdyq qory «Quqyqtyq reforma» baǵdarlamasy aıasynda «QR-daǵy ıntellektýaldy damý, psıhıkalyq densaýlyǵy buzylǵan adamdardyń quqyqtaryn qorǵaýmen baılanysty jaǵdaı» taqyrybyndaǵy jobany iske asyryp, qazirgi ýaqytta, Qazaqstandaǵy psıhıkalyq densaýlyǵy men ıntellektýaldy damýy buzylǵan adamdardyń quqyǵyn saqtaýǵa baılanysty jaǵdaıǵa taldaý jasaýda.

Bul týraly búgin Almatyda ótken arnaıy baspasóz máslıhatynda atalmysh qordyń Prezıdenti Baqyt Túmenova málim etti, dep habarlaıdy QazAqparat.

Onyń aıtýynsha, bul joba 2008 jylǵy jeltoqsan aıynda Qazaqstan BUU-nyń múgedekterdiń quqyqtary týraly konventsııasyna qosylýyna baılanysty ıntellektýaldy shekteýli múmkindikterge ıe adamdardyń quqyqtaryn qamtamasyz etý jáne ony qorǵaý salasynda azamattyq qoǵam júzege asyryp otyrǵan is-sharalardyń biri bolyp tabylady.

«Qazaqstan Konventsııaǵa qosyla otyryp, múgedekterdiń barlyq quqyqtaryn jáne adamnyń negizgi erkindigin tolyǵymen jáne teńdikte júzege asyrýdy qorǵaý, qoldaý jáne yntalandyrýdyń qajettiligin túsinetinin baıqatty. Bul rette Konventsııany ratıfıkatsııalaý belgili bir sharttardyń oryndalýy jaǵdaıynda múmkin bolatynyn eskerý qajet. Jaǵdaıdy shynaıy baǵalaý psıhıkalyq aýrýǵa shaldyqqan adamdardy áleýmettik kiriktirý salasyndaǵy asa tıimdi sheshimderdi izdeý jolyna aparar qadamdardyń biri bolyp tabylady», - deıdi Soros-Qazaqstan qorynyń «Quqyqtyq reforma» baǵdarlamasynyń úılestirýshisi Aınur Shákenova.

«Aman-saýlyq» QQ prezıdenti Baqyt Túmenovanyń pikirinshe, atalǵan joba aqyl-oı jáne psıhıkalyq damýynda buzylysy bar adamdardyń quqyqtaryn saqtaýmen baılanysty jaǵdaıdy ózgertýge, memlekettik medıtsınalyq-áleýmettik mekemelerge balama bolatyn qoǵamdastyqtar men ınstıtýttardy ary qaraı damytýǵa, sondaı-aq, psıhıkalyq densaýlyǵy men ıntellektýaldy damýy buzylǵan adamdardyń máseleleri men muqtajdaryna qoǵamnyń nazaryn keńinen aýdarýǵa múmkindik beredi. Onyń aıtýynsha, júrgizilip jatqan zertteýler psıhıkalyq densaýlyq qyzmetiniń búgingi kúni halyqaralyq standarttarǵa qanshalyqty sáıkes keletinin anyqtaıtyn bolady.

Ol sonymen qatar, bul joba Soros-Qazaqstan qorynyń (SQQ) qoldaýymen, «Meńgerý» mentaldy densaýlyq salasyndaǵy qyzmetti qoldanýshylardyń quqyǵyn qorǵaý» qoǵamdyq uıymymen, Respýblıkalyq psıhıatrııa, psıhoterapııa jəne Narkologııa ǵylymı-tájirıbelik ortalyǵymen, «Psıhıatrııadaǵy jahandyq bastama» halyqaralyq úkimettik emes uıymymen birge áriptestik aıasynda júzege asyrylyp jatqandyǵyn jetkizdi.