Úkimettik emes uıymdar qyzmetin retteıtin Zań qabyldandy - Parlament
Qujat azamattardyń áleýmettik bastamalaryn iske asyrýdyń pármendi quraly bolýǵa tıisti qazaqstandyq qoǵamdy odan ári áleýmettik jańǵyrtý jáne azamattyq qoǵam ınstıtýttaryn jetildirý maqsatynda ázirlengen. Bul rette qujatta úkimettik emes uıymdardyń mártebesin, olardyń qyzmetteriniń erekshelikterin eskere otyryp, quqyqtyq retteý tetikterin jetildirý, sonymen birge qoǵamdyq birlestikterdi memlekettik qoldaý sharalaryn qamtıdy.
Parlament qabyldaǵan Zańǵa sáıkes, memlekettik organdar úkimettik emes uıymdarmen ózara is-qımylyn jetildirýde birqatar baǵyttar boıynsha sharalar atqaratyn bolady. Atap aıtqanda, ÚEU úshin memlekettik, memlekettik emes granttar men respýblıkalyq jáne óńirlik deńgeıdegi áleýmettik mindetterdi sheshýge edáýir úles qosqandary úshin syıaqylar túrinde qarjylandyrýdyń jańa nysandary engiziledi. Budan bólek, memleket pen qoǵamda bolyp jatqan protsesterge jedel den qoıý maqsatynda ÚEU granttyq qarjylandyrý salasyndaǵy biryńǵaı operatordyń fýnktsııalaryn oryndaıtyn uıym qurylady.
Budan bólek, ÚEU jobalaryn granttyq qarjylandyrý engiziledi. Osyǵan oraı, qujattyń basty maqsaty ÚEU-ny qoldaý, olardy jetildirý men damytý bolyp tabylady. Granttardan bólek, ÚEU úshin arnaıy syıaqylar taǵaıyndalady. Jańa erejege sáıkes, granttar ÚEU-ǵa beıimdendirilgen konkýrstar arqyly berilmek. Syıaqylar jyl saıyn ÚEU úshin 15 atalym boıynsha uıymdastyrady.
«Jalpy alǵanda qujattyń qabyldanýy qoǵamdyq bastamalardy memlekettik qoldaý sharalaryn iske asyrýdyń quqyqtyq tetikterin zańnamalyq turǵydan bekitýge múmkindik beredi. Bul qadamdar óz kezeginde úkimettik emes sektordyń ornyqty damýyna, azamattyq belsendilikti arttyrýǵa, ÚEU sapaly áleýmettik qyzmetterdi usynýyna jáne azamattyq qoǵam ınstıtýttarynyń nyǵaıýyna jol ashady», - deıdi zańnamadaǵy ózgerister týraly baıandaǵan senator Birǵanym Áıtimova.