Úkimettik emes sektor ár kezde de áleýmettik jańartýlardy jetkizýshi boldy - QR Parlamenti Májilisiniń depýtaty A.Soloveva

ASTANA. Shildeniń 23-i. QazAqparat /Asqar Bımendın/ - Úkimettik emes sektor ár kezde de áleýmettik jańartýlarmen úzdik ıdeıalardy jetkizýshi boldy. Bul týraly búgin Qazaqstannyń azamattyq alıansy uıymdastyrýymen SocialCamp Astana 2010 atty elimizdiń úkimettik emes uıymdary (ÚEU) úshin aýqymdy beıresmı konferentsııa barysynda QR Parlamenti Májilisiniń depýtaty A.Soloveva aıtty.

Konferentsııanyń basty maqsaty - eldiń qoǵamdyq sektorynyń jumysyn eleýlirek, ashyǵyraq jáne tıimdirek ete túsý. SocialCamp Astana 2010 mindetteriniń ishinde qoǵamdyq sektordy damytýǵa jańa ynta berý jáne jaqyn aradaǵy úsh jylǵy jumystardyń negizgi trendterin belgileý de bar.

Eldiń ártúrli qaıyrymdylyq qorlary, qoǵamdyq birlestikteri, jastar jáne volonterlik uıymdary, blogerleri men bastamashy toptary Astanada bas qosyp, úsh kún boıy fandreızıng mádenıetin oqyp, áleýmettik máselelerdi sheshýdiń jańa tásilderin úırenýge bas qosady. Sondaı-aq olar óz tájirıbelerimen bólisip, 2012-2015 jyldarǵa arnalǵan Azamattyq qoǵamdy damytý tujyrymdamasyna ıdeıalary men usynystaryn engizedi.

Atalǵan alqaly jıyn aıasynda Social Ideas Market atty áleýmettik jobalar jármeńkesi ótkizilmek. Usynylǵan ótinimderden eń jarqyn jáne nátıjege baǵyttalǵan jobalar tańdalyp, olar jalpy somasy 3000 dollarlyq grantqa ıe bolady.