Úkimetten sapaly bilimdi talap ete bilýimiz kerek - Erbolat Muhamedjan
«Biz úkimetten talap etken kezde materıaldyq jaǵdaıdy basty nazarǵa qoıamyz. Kıim, tamaq, úı talap etemiz. Nege sapaly bilim ber dep suramasqa? Mektepter men ýnıversıtetter sapaly bilim bermeıdi degen talappen mıtıngke shyqqan adamdy kórdińiz be? Laıyqty bilim bere almasań, sapaly bilim alýdyń jolyn kórset dep te eshkim aıtpaıdy. Jalpy halyq emes, belgili bir qoǵam ókilderi ǵana bul máseleni kóterip júr» dedi ol Qazaqstan ulttyq arnasynyń efırinde ótken «Ashyq alań» baǵdarlamasynda.
Memleket basshysy Qasym-Jomart Toqaevtyń Ulttyq qoǵamdyq senim keńesiniń úshinshi otyrysynda bilim salasyn damytýǵa erekshe toqtalǵany belgili. Ekonomıka bilimge táýeldi bolǵan soń bul salany túbegeıli reformalaý kerek dedi.
Osyǵan oraı, 2025 jylǵa deıin bilim salasyna bólinetin qarajat - 6 ese, ǵylymǵa bólinetin qarjy - 7 ese ósetin boldy.
Tikeleı efır barysynda Erbolat Muhamedjan Bilim jáne ǵylym mınıstrligi óte jaqsy sheshim shyǵarǵanyn da aıtyp ótti.
«Áleýmetke problema shyqqan soń, halyq muny bilýi kerek. Grantty buryn ýnıversıttke beretin. Ýnıversıtetter soǵan jabysyp otyratyn. Qazir grantty stýdentke berdi. Stýdent túsken ýnıversıtetine kóńili tolmasa, basqa reıtıngi joǵary oqý ornyna aýysyp kete alady. Osyndaı durys ózgerister osydan 15 jyl buryn jasalýy kerek edi»,- deıdi Erbolat Muhamedjan.