Úkimette JOO-lardy damytý, jataqhanalar salý jáne ınnovatsııalardy qoldaý máseleleri qaraldy
Ǵylym jáne joǵary bilim mınıstri Saıasat Nurbek qazirgi ýaqytta stýdentter úshin jataqhanalarmen qamtamasyz etý jumystary júrip jatqanyn baıandady. Bul rette óńirlerde, atap aıtqanda Astana, Almaty, Qaraǵandy jáne Túrkistan oblystarynda jańa jataqhanalar salý úshin qurylys salýshylarmen jáne áleýetti ınvestorlarmen jumysty kúsheıtý, sondaı-aq memlekettik-jekemenshik áriptestik tetigin jetildirýdi jalǵastyrý josparlanyp otyr.
Budan basqa, jekelegen áleýmettik osal toptardyń arasynan aýyldyq jerlerden kelgen stýdentterdi jatyn oryndarmen qamtamasyz etý úshin jańa tetikti qoldaný, atap aıtqanda, jataqhana ıelerine operatsııalyq shyǵyndardy óteý usynylady.
Premer-Mınıstr osy tásilderdi qoldap, bul mehanızmdi kolledj stýdentterine de qoldanýdy maquldady.
Sondaı-aq keńeste joǵary oqý oryndarynyń ınfraqurylymyn damytý, atap aıtqanda, EUÝ jáne QazUÝ qalashyqtaryn salý máselesi qaraldy. Bul baǵytta barlyq qajetti kommýnıkatsııalardy jetkize otyryp, jer ýchaskelerin bólý pysyqtalatyny atap ótildi.
«Bul – eń mańyzdy máselelerdiń biri. Qazaqstannyń jetekshi joǵary oqý oryndarynda bilim alýǵa degen suranys turaqty artyp keledi, sondyqtan qosymsha korpýstar men jataqhanalar salý múmkindikterin tabý qajet. Bul máselelerdi Astana jáne Almaty ákimdikterimen birlesip pysyqtaý kerek», — dedi Álıhan Smaıylov.
Sondaı-aq Premer-Mınıstr 2023 jyly úsh otandyq joǵary oqý ornynyń bazasynda akademııalyq artyqshylyq ortalyqtaryn qurý jónindegi pılottyq jobanyń iske qosylýyn qoldady. Onyń aıasynda tańdalyp alynǵan oqý oryndarynda qosymsha qural-jabdyqtar paıda bolady, Zertteý ýnıversıtetiniń modeline kóshý jáne jańa oqý baǵdarlamalaryn iske qosý bastalady.
«Adamı kapıtaldy damytý, jastarǵa bilim berý úshin ınvestıtsııalar tartý bizdiń aldymyzdaǵy eń basym baǵyttardyń biri bolyp tabylady. Sondyqtan jobany respýblıkanyń basqa joǵary oqý oryndaryna odan ári keńeıtý múmkindigin pysyqtaı otyryp, iske asyrý qajet», — dep atap ótti Álıhan Smaıylov.
Sonymen qatar Premer-Mınıstr óńirlik ekonomıkanyń negizgi problemalaryn sheshý úshin oblys ákimdikterine ǵylymı-zertteý jáne tájirıbelik-konstrýktorlyq jumystardy (ǴZTKJ) qarjylandyrý boıynsha qosymsha bıýdjettik múmkindikter berýdi maquldady. Bul jergilikti jerlerde ınnovatsııalyq belsendilikti yntalandyrýǵa múmkindik beredi. Bul rette ol jer qoınaýyn paıdalanýshylar ǴZTKJ júrgizýge ótinim qaldyra alatyn biryńǵaı tsıfrlyq portal qurýdy baqylaýda ustaý qajet ekenin aıtty.
Sondaı-aq keńeste Memleket basshysynyń Saılaýaldy baǵdarlamasy, Qazaqstan halqyna Joldaýy jáne Úkimettiń keńeıtilgen otyrystary sheńberinde qoıǵan mindetterin eskere otyryp, Ǵylym jáne joǵary bilim mınıstrliginiń salalyq tujyrymdamalary men damý josparyn ázirleý máseleleri qaraldy.
Sonymen qatar salalyq joǵary oqý oryndary men ǴZI-di basqarý isine Ǵylym jáne joǵary bilim mınıstrliginiń qatysý deńgeıin arttyrý, joǵary ǵylymı-tehnıkalyq komıssııanyń qyzmeti, «QR keıbir zańnamalyq aktilerine ǵylym máseleleri boıynsha ózgerister men tolyqtyrýlar engizý týraly» zań jobasyn ázirleý jáne taǵy basqa máseleler talqylandy.
Keńes qorytyndysy boıynsha qabyldanǵan sheshimder kadrlardy daıarlaý, joǵary bilim berýdi jańǵyrtý salasyn damytýǵa, jalpy qazaqstandyq ǵylymnyń tanymaldyǵy, tartymdylyǵy men bedeline jaqsy serpin beredi.
Foto: primeminister.kz