Úkimette jańa agrarlyq JOO ashý máselesi qarastyrylýda

PETROPAVL. QazAqparat – Petropavlda túrli salaǵa qajet 73 zerthana ornalasqan joǵary oqý ornynyń oqytý-zerthanalyq ǵımaraty salynyp jatyr, dep habarlaıdy QazAqparat tilshisi.

Soltústik Qazaqstan oblysy ákiminiń baspasóz qyzmetiniń málimetinshe, búgin óńir basshysy Qumar Aqsaqalov Petropavlda salynyp jatqan birqatar qurylys nysanyn aralady. Solardyń biri – M.Qozybaev atyndaǵy Soltústik Qazaqstan ýnıversıtetin iń jańa korpýsy. Bul jerde ınjenerııa, tsıfrlyq tehnologııa, kólik, mashına jasaý, energetıka jáne radıotehnıka, azyq-túlik qaýipsizdigi, agronomııa, orman sharýashylyǵy jáne medıtsına sııaqty salalardy qamtyǵan 73 zerthana ornalaspaq.

«Qıyn ekonomıkalyq jaǵdaıǵa qaramastan mańyzdy jobany qolǵa aldyq. Elimizde sońǵy jyldary ýnıversıtetter úshin jańa korpýstar salynǵan emes. Sondaı-aq jergilikti joǵary oqý ornyna sońǵy 5 jylda keshendi qondyrǵy alynbaǵan. Injenerııa, aýyl sharýashylyǵy jáne ǵylymı baǵyttar boıynsha zerthanalar akkredıtteledi. Nátıjesinde ǵylymdy jáne óńir ekonomıkasyn damytýǵa jumys istemek. «Jerdi qashyqtan zondtaý» zerthanasy aýyl sharýashylyǵyn tsıfrlandyrýǵa qajet. Al, bul, óz kezeginde az shyǵynmen mol ónim alýǵa múmkindik beredi», - deıdi Qumar Aqsaqalov.

Korpýsta medıtsınanyń joǵary mektebiniń stýdentterine arnalǵan zerthanalar da qarastyrylǵan. Máselen, hırýrgııa, anestezıologııa jáne reanımatsııa kabınetteri bolady. Stýdentter robottarda, mýlıajdarda trenajerlar men sımýlıatorlarda ózdiginen sheberlikterin shyńdamaq.

Joǵary oqý orny oqytýshylarynyń eńbekaqysy da artqan. Qazir ortasha eńbekaqy – 264 myń teńge. 1 qyrkúıekten oqytýshylardyń tabysy 20% artsa, 1 qazannan bastap qalǵan qyzmetkerlerdiń eńbekaqysy 10% kóbeımek.

«Qazir Úkimette Petropavlda agrarly ýnıversıtet ashý máselesi qaralyp jatyr. Bul elimizde ǵana emes, oblysta agrarlyq ǵylymdy damytýǵa serpin beredi. Joǵary oqý orny agroónerkásiptik keshenge qajet mamandardy daıarlar edi», - deıdi oblys ákimi.

SQO-da stýdentter jataqhanasynyń jetispeýshiligi máselesi de birtindep sheshilip jatyr. Qazir 306 orynǵa shaqtalǵan jáne 244 adamdyq eki jataqhana salynyp jatyr. Olar qoldanysqa berilýimen qajettilik 1044-ke qysqarady.

1 200 orynǵa arnalǵan taǵy bir jataqhananyń qurylysy josparda bar. Onyń júzege asýymen jataqhana máselesi tolyǵymen sheshilmek.