Úkimette ótken jıynda bıznestiń ózekti máseleleri talqylandy

ASTANA. QazAqparat - Premer-Mınıstrdiń orynbasary – qarjy mınıstri Erulan Jamaýbaev memlekettik organdardyń, «Atameken» UKP jáne bıznes-qoǵamdastyq ókilderiniń qatysýymen kásipkerliktiń naqty máselesi boıynsha jıyn ótkizdi. QazAqparat bul týraly Úkimet basshysynyń baspasóz qyzmetine silteme jasap habarlaıdy.

Jıyn barysynda Memleket basshysynyń kásipkerlik qyzmetti «taza paraqtan» retteýdi engizý, sondaı-aq memlekettik baqylaý jáne qadaǵalaý júıesin avtomattandyrý jónindegi tapsyrmalaryn oryndaý máseleleri qaraldy.

Bıznes-qoǵamdastyq ókilderi salyq preferentsııalaryna, jer qatynastaryna, kólik shyǵyndaryn sýbsıdııalaýǵa, memlekettik satyp alý rásimderin jetildirýge jáne basqa da máselelerge qatysty túıitkilderdi kóterdi.

Jıyn qorytyndysy boıynsha E. Jamaýbaev birqatar tıisti tapsyrmalar berdi, sonyń ishinde belgilengen merzimde retteýshi aktilerdi taldaýdy aıaqtaý boıynsha.

Foto: primeminister.kz