Úkimette otandyq mashına jasaý salasyndaǵy máseleler qaraldy

ASTANA. QazAqparat - QR Premer-Mınıstri Álıhan Smaıylovtyń tóraǵalyǵymen ótken keńeste mashına jasaýdy damytýdyń ózekti máseleleri qaraldy. Keńeske memlekettik organdar, ulttyq kompanııalar men salalyq kásiporyndardyń basshylary qatysty, dep habarlaıdy primeminister.kz.

Keńes barysynda mashına jasaý salasyn damytýdyń keshendi josparyn jáne vagon jasaýdy damytý jónindegi jol kartasyn ázirleý, sondaı-aq jergilikti qamtýdy damytý jáne áleýmettik úshjaqty áriptestik jónindegi salalyq komıssııanyń jumysynyń tıimdiligin arttyrý máseleleri talqylandy.

Premer-Mınıstr salany qoldaý jónindegi bastamalardy maquldady.

Ol jergilikti qamtýdy damytýdy naryqtyq quraldar: offteık jáne ofsettik kelisimsharttar esebinen yntalandyrý qajet ekenin atap ótti.

Budan basqa, ǵylymı-ónerkásiptik klasterlerdi qurý, mashına jasaý kásiporyndaryn shıkizatpen, qoljetimdi kredıttik resýrstarmen jáne basqa da yntalandyrý sharalarymen qamtamasyz etý máseleleri qaraldy.

Álıhan Smaıylov memlekettik organdarǵa olardy egjeı-tegjeıli pysyqtaýdy tapsyrdy.

«Qazaqstan mashına jasaýshylar odaǵy» ZTB basshysy Meıram Pishembaev, «Qazaqstan Injınırıng» UK» AQ basshysy Temirjan Ábdirahmanov, «Qazenergokabel» AQ basshysy Vladımır Bobrov, «Atyraýmunaımash» JShS basshysy Temirlan Darkembaev, «ZIKSTO» AQ basshysy Renat Shamsýtdınov baıandama jasady.

Keńes qorytyndysy boıynsha Premer-Mınıstr barlyq aıtylǵan máseleler baqylaýǵa alynatynyn atap ótti.

«Biz sizdermen únemi kezdesip turamyz. Ara-tura jańa máseleler týyndap jatady: olardyń keıbiri boıynsha birden sheshim qabyldasaq, basqalary normatıvtik-quqyqtyq ózgeristerdi qajet etedi. Birqatar problemalar boıynsha egjeı-tegjeıli zertteý júrgizý qajet. Biz osy máselelerdi ózara birlesip sheshýge tyrysamyz» , — dedi Álıhan Smaıylov otandyq mashına jasaýshylarǵa qarata aıtqan sózinde.

Foto: primeminister.kz