Úkimette KEGOC aktsııalarynyń bir bóligin SPO arqyly básekeli ortaǵa berý máselesi talqylandy

ASTANA. QazAqparat - QR Premer-Mınıstri Álıhan Smaıylov ortalyq memlekettik organdar, Prezıdent Ákimshiligi, Ulttyq bank, óńir ákimdikteri, «Samuryq-Qazyna», «Báıterek» holdıngteri jáne basqa da uıym basshylarynyń qatysýymen ekonomıkany jańǵyrtý jónindegi memlekettik komıssııanyń otyrysyn ótkizdi, dep habarlaıdy QazAqparat.

Úkimet baspasóz qyzmetiniń málimetinshe, jıynda óńdeý ónerkásibi men aýyl sharýashylyǵynda 5 myńnan astam jumys ornyn ashý arqyly jańa jobalardy iske asyrý, mashına jasaýda lokalızatsııalaýdy keńeıtý jáne qalalardaǵy aǵyndy sýdy tazartý deńgeıin 78%-dan 89%-ǵa deıin jetkizýge múmkindik beretin 24 káriz tazartý qurylysyn salý jospary qaralǵan.

Sonymen qatar «Qazaqstan ınjınırıng» UK» AQ qyzmetiniń máseleleri, «KEGOC» AQ aktsııalarynyń bir bóligin SPO arqyly básekeles ortaǵa berý, sondaı-aq 10 kommýnaldyq menshik uıymyn jekeshelendirýdiń 2021-2025 jyldarǵa arnalǵan keshendi josparynan alyp tastaý máseleleri talqylandy.