Úkimette BJZQ-nyń ázerbaıjandyq bankke salǵan ınvestıtsııasy qaralady

ASTANA. QazAqparat - Úkimette BJZQ qarjysyn problemaly ázerbaıjandyq bankke ınvestıtsııalaý máselesi qaralady. Bul týraly búgin Parlament Senatynda tilshilerge QR Qarjy mınıstri Baqyt Sultanov málim etti, dep habarlaıdy QazAqparat.

Atap aıtqanda, mınıstrden BJZQ-nyń Ázerbaıjan halyqaralyq bankine ınvestıtsııasyn baǵalaý boıynsha qandaı jumystar júrgizilgeni suraldy. Óz kezeginde B. Sultanov búginde tıisti jumystar júrip jatqanyn aıtty. «Ulttyq bank qajetti jumystardy iske asyryp jatyr. Biz ony Úkimettiń otyrysynda talqylaıtyn bolamyz»,-dedi Qarjy mınıstr.

Budan buryn belgili sarapshy Rahym Oshaqbaev BJZQ-nyń 71,3 mlrd. teńge aktıvi Ázerbaıjannyń problemalyq Halyqaralyq banki oblıgatsııalaryna salynǵany týraly habarlaǵan edi.

Al jaqynda Danııar Aqyshev BJZQ qarjysyn Ázerbaıjan bankine kimniń ınvestıtsııalaǵanyn aıtqan bolatyn. 

Onyń aıtýynsha, Ázerbaıjan bankindegi problema 2015 jyldan bastaldy. 2016 jyldan bastap QR UB Ázerbaıjan úkimetine, Ázerbaıjan bankine talap qoıa bastady.

«Biraq olar merziminen buryn qaryzdy qaıtarýǵa kelispedi. Mámileniń mán-jaıyna qatysty kóp suraq jaýapsyz bolyp otyr. UB isti quqyq qorǵaý organdaryna beredi», - dedi D.Aqyshev.