Úkimette balalardyń qaýipsizdigi men jazǵy demalysy máseleleri talqylandy

ASTANA. QazAqparat – Premer-Mınıstrdiń orynbasary – Eńbek jáne halyqty áleýmettik qorǵaý mınıstri Tamara Dúısenovanyń tóraǵalyǵymen ótken keńeste mınıstrlikter men ákimdikterdiń balalar qaýipsizdigin qamtamasyz etý, sýmen qamtý, mektepterdiń sanıtarııasy, tamaqtandyrýdy jáne balalardyń jazǵy demalysyn uıymdastyrý men saýyqtyrý lagerlerin qurý jónindegi jumystarynyń qorytyndylary tyńdaldy. QazAqparat bul týraly Úkimettiń baspasóz qyzmetine silteme jasap habarlaıdy.

Oqý-aǵartý vıtse-mınıstri E. Ospan beınekameralardy tekserý nátıjeleri men mektepterdegi balalardyń qaýipsizdigin qamtamasyz etý jónindegi is-qımyldardyń biryńǵaı algorıtmi týraly baıandady.

Tamara Dúısenova Oqý-aǵartý, Іshki ister, Tsıfrlyq damý mınıstrlikterine bilim berý uıymdarynyń qaýipsizdik júıelerine qoıylatyn biryńǵaı talaptardy qamtamasyz etýdi tapsyrdy.

Densaýlyq saqtaý, Oqý-aǵartý, Saýda jáne ıntegratsııa mınıstrlikterine halyqaralyq talaptardy eskere otyryp, mektepterdegi sanıtarııa men gıgıenanyń ulttyq standartyn ázirleý tapsyryldy.

Sondaı-aq Premer-Mınıstrdiń orynbasary Oqý-aǵartý, Densaýlyq saqtaý, Tótenshe jaǵdaılar mınıstrlikterine jazǵy lagerlerdiń qyzmetin muqııat zerdelep, oryn alǵan barlyq kemshilikterdi joıýdy jáne kelesi maýsymda balalardyń jazǵy demalysyn uıymdastyrý boıynsha aldyn alý sharalaryn qabyldaýdy tapsyrdy.

«Balalardyń demalysy men bos ýaqytyn ótkizetin nysandar, balalar ortalyqtary kópfýnktsıonaldy bolýy tıis, onda balalardyń jan-jaqty, zııatkerlik, shyǵarmashylyq, fızıkalyq damýy qamtamasyz etilýi qajet», — dep atap ótti Tamara Dúısenova.