Úkimette 2022 jylǵa arnalǵan is-qımyl baǵdarlamasyn ázirleý jóninde keńester ótti

NUR-SULTAN. QazAqparat - QR Premer-Mınıstri Álıhan Smaıylov Ulttyq ekonomıka, Aýyl sharýashylyǵy, Ekologııa, geologııa jáne tabıǵı resýrstar, Tótenshe jaǵdaılar, Qorǵanys mınıstrlikteriniń basshylyǵymen Úkimettiń 2022 jylǵa arnalǵan is-qımyl baǵdarlamasyn ázirleý máseleleri jóninde keńester ótkizdi. Bul týraly QazAqparat Úkimettiń saıtyna silteme jasap habarlaıdy.

Ulttyq ekonomıka mınıstrligi usynǵan sharalar halyqtyń tabysyn arttyrýǵa, shaǵyn jáne orta bıznesti damytýǵa, jańa ınvestıtsııalyq saıasatty qalyptastyrýǵa, memlekettiń el ekonomıkasyna qatysý úlesin qysqartýǵa, makroekonomıkalyq turaqtylyqty qamtamasyz etýge, memlekettik basqarý júıesin jańǵyrtýǵa jáne tarıftik saıasatty jetildirýge baǵyttalǵan.

Aýyl sharýashylyǵy mınıstrligi usynǵan sharalar jańa alma baqtaryn otyrǵyzý, et ónimderin qaıta óńdeý, qus etin óndirý, balyq ósirý, kartop pen kókónisterdi saqtaý jónindegi ınvestıtsııalyq jobalardy iske asyrýdy kózdeıdi. Aýyl sharýashylyǵy taýaryn óndirýshilerdi jeńildetilgen nesıemen, kóktemgi egis jumystaryn júrgizýge arzandatylǵan dızel otynymen qamtamasyz etý, AÓK sýbektilerin sýbsıdııalaý júıesin jetildirý, veterınarııalyq júıeni reformalaý josparlanyp otyr. Óndiriske zamanaýı resýrs únemdeýshi tehnologııalardy engizý, tuqym sharýashylyǵyn jáne jem-shóp óndirisin damytý boıynsha sharalar qabyldanady.

Ekologııa, geologııa jáne tabıǵı resýrstar mınıstrligi qorshaǵan ortaǵa lastaýysh zattar shyǵaryndylaryn azaıtý, lastanǵan jerlerdi qalpyna keltirý, zııandy qaldyqtar jınaqtalǵan baıyrǵy qoımalardy joıý, qaldyqtardy basqarý júıesin jetildirý, kólderdi qalpyna keltirý, sý ınfraqurylymyn tsıfrlandyrý, balyq salasyn damytý sharalaryn usyndy. Ýtılızatsııalyq alym mólsherlemesi qaıta qaralady. Tótenshe jaǵdaılar mınıstrligi azamattyq qorǵanys áskerı bólimderiniń uıymdyq-shtattyq qurylymyn reformalaý, azamattyq qorǵaý organdarynyń materıaldyq-tehnıkalyq jáne áleýmettik qamtamasyz etilýin nyǵaıtý jóninde sharalar qabyldaýdy kózdep otyr. Qorǵanys mınıstrligi Qarýly Kúshterdi reformalaý jónindegi birinshi kezektegi mindetterdi iske asyrý boıynsha sharalar qabyldaıdy.

Áskerlerdiń jaýyngerlik ázirligi men jaýyngerlik qabiletin arttyrý maqsatynda jeke quramnyń sanyn ulǵaıtý, áskerlerdi zamanaýı qarý-jaraqpen jáne áskerı tehnıkamen jaraqtandyrý, qajetti áskerı ınfraqurylymmen jaraqtandyrý sharalary kózdelgen.