Úkimetke jattyqtyrýshylardyń jalaqysyn kóterý týraly usynys engiziledi
«Júrgizilgen saraptama sport túrleri boıynsha bilikti jattyqtyrýshylardyń múldem jetispeıtindigin anyqtap berdi. Bul olardyń jalaqylarymen tikeleı baılanysty. Búginde azamattyq qyzmetshilerdiń eńbekaqy júıesine sáıkes, eńbek ótili, sanat joq, biliktiligi ortasha deńgeıdegi jattyqtyrýshylardyń jalaqysy 63 myń teńgeni quraıdy. Osyǵan oraı dene shynyqtyrý fakýltetterin bitirýshiler qyzmet kórsetý, kúzet fırmalary, quqyq qorǵaý organdary salasy qyzmetkerleriniń qataryn tolyqtyryp otyr. Biraq, sportty emes», - dedi Dáýren Abaev mınıstrliktiń keńeıtilgen alqa otyrysynda.
Osy rette mınıstr Şýchede ótken keńeste jattyqtyrýshylardyń zeınet jasyna jetip qalýyna jáne zeınet jasynda ekendigine baılanysty kadr tapshylyǵy arta beretindigin aıtqanyn eske saldy.
«Osyǵan oraı Úkimetke daıyndyqtyń bastapqy kezeńinde jattyqtyrýshylardyń jalaqysyn kóterý týraly usynys engiziledi jáne olardy materıaldyq turǵyda yntalandyrý máselesi pysyqtalady», - dedi ol.