Úkimet jún eksportyna salynatyn nóldik deńgeıdegi salyq merzimin uzartty

ASTANA. QazAqparat - Premer-Mınıstrdiń orynbasary – saýda jáne ıntegratsııa mınıstri Serik Jumanǵarınniń tóraǵalyǵymen 2023 jylǵy 22 aqpanda ótken syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııanyń (VAK) otyrysy barysynda syrtqy saýdany retteý aıasynda birqatar sheshim qabyldandy.

Júndi áketýge arnalǵan eksporttyq kedendik bajdyń nóldik mólsherlemesiniń qoldanylý merzimin 2024 jylǵy 31 jeltoqsanǵa deıin uzartý týraly sheshim qabyldandy. Bul másele Aýyl sharýashylyǵy mınıstrliginiń bastamasymen qaraldy, al buǵan deıin Shymkentte Serik Jumanǵarınmen kezdesýde bıznes ókilderimen kóterilgen bolatyn.

AShM málimeti boıynsha, elimizde jyl saıyn 40 myń tonnaǵa jýyq qoı júni óndiriledi, onyń ishinde juqa jáne jartylaı juqa jún óńdeledi, bul jalpy óndiris kóleminiń 20%-y ǵana. Eksporttyq kedendik bajdyń kúshin joıǵanda qyrqylǵan júndi tikeleı ótkizýden fermerlerge túsetin tabys 20-25%-ǵa, qaıta óńdeý kásiporyndarynda 10%-ǵa ulǵaıady. Sonymen qatar fermerlerdiń selektsııaǵa degen qyzyǵýshylyǵy artady, bul bııazy júndi qoılardy kóbeıtýge yqpal etpek.

VAK sheshimimen 2023 jylǵy 31 jeltoqsanǵa deıingi merzimge iri qara maldyń terisine eksporttyq kedendik bajdy 1 tonna úshin 200-den 100 eýroǵa deıin tómendetý jáne usaq maldyń terisine eksporttyq kedendik bajdardy joıý maquldandy.

Qazirgi ýaqytta ІQM basynyń sany jyl saıyn ósýde, eksport pen ishki naryqta suranys tómen, bul jaǵdaıda óńdelmegen teri qaldyqtarynyń kólemi artady. Atap aıtqanda, 2020 jyly 2019 jylmen salystyrǵanda ósim 406 myń dana nemese 15,7%-dy qurady. Aýyl sharýashylyǵy janýarlarynyń óńdelmegen terilerine kedendik áketý bajdarynyń tómendeýi naryqta olarǵa suranys qalyptastyrýǵa múmkindik beredi, óndirýshiler men daıyndaýshylar olardyń sapasyn jaqsartýǵa múddeli bolady dep kútilýde. Bul óndirýshi uıymdardyń qyzmetin jandandyrýǵa jańa serpin beredi, bul qaıta óńdeý ónerkásibiniń damýyna, jeke qosalqy jáne sharýa qojalyqtarynyń ónim óndirý men satýdyń ósimine yqpal etetin bolady.

Sondaı-aq VAK otyrysynda attraktsıondyq tehnıkanyń keıbir túrlerine, balyqqa arnalǵan jemge kedendik ákelý bajdarynyń mólsherlemelerin tómendetý boıynsha usynystar qaraldy. Qazaqstan Respýblıkasynyń aýmaǵynan kómirdi jáne lıgnıtti (qońyr kómirdi) avtomobıl kóligimen áketýge alty aı merzimge ýaqytsha tyıym salýdy belgileý týraly sheshim qabyldandy. ІQM jáne usaq mal basynan basqa, tiri iri qara maldy, qoı men eshkini QR aýmaǵynan áketýge kvotanyń qoldanylý merzimi 6 aıǵa uzartyldy.

Foto: twitter.com/stockcoau