Úkimet jumys tobynyń Aqmola oblysyna sapary: MÁMS tıimdi tustary túsindirildi

AQMOLA OBLYSY. QazAqparat - Aqmola oblysyna jumys saparymen kelgen QR Premer-Mınıstriniń orynbasary Berdibek Saparbaev bastaǵan úkimettik jumys toby Kókshetaýdaǵy Aqmola oblystyq kópbeıindi aýrýhanasynda medıtsınalyq qyzmetkerlermen kezdesti, dep habarlaıdy QazAqparat tilshisi.

Kezdesýge jumys tobynyń quramynda bolǵan Densaýlyq saqtaý vıtse-mınıstri Kamaljan Nadyrov qatysty.

Júzdesýde sóz alǵan B.Saparbaev arnaıy baıandama jasap, Memleket basshysynyń tapsyrmasyna sáıkes, elimizde júrgizilip jatqan memlekettik baǵdarlamalar sheńberinde densaýlyq, áleýmettik medıtsınalyq saqtandyrý salalary boıynsha atqarylyp jatqan jumystar men bólinetin qarjy týraly aıtty.

«Búgingi saparymyzdyń negizgi maqsaty - Memleket basshysynyń Joldaýynda Úkimetke bergen tapsyrmalarynyń qalaı oryndalyp jatqany jáne keleshekte atqarylatyn jumystaryn halyqqa keńinen túsindirip, málimet berý. Osy kúni qandaı da bir saıası daǵdarystar men ekonomıkalyq qıynshylyqtarǵa qaramastan Úkimettiń aldynda halyqtyń turmysyn jaqsartý mindeti tur», - dep atap ótti B. Saparbaev.

Kezdesýde medıtsına salasy qyzmetkerleriniń eńbekaqysyn arttyrý, mindetti áleýmettik medıtsınalyq saqtandyrýdy engizý, medıtsınalyq qyzmet sapasyn arttyrý jáne materıaldyq-tehnıkalyq bazany nyǵaıtý máseleleri talqylandy.

«Búgingi kúni respýblıka boıynsha shartty túrde halyqtyń 87 paıyzy saqtandyrylǵan bolsa, onyń ishinde 10 mıllıon adam jeńildetilgen sanatqa jatady, 5,4 mıllıon jaldamaly jumysshylar, 700 myńǵa jýyǵy jeke kásipkerler, taǵy 200 myń adam bar. Eldiń qalǵan azamattary júıeniń derbes qatysýshylary bola alady.

Aqmola oblysy boıynsha 392,4 myń adamǵa jeńildik jasalady. 234,8 myń adam jaldamaly jumysshylar qataryna jatady. 30,9 myń adam jeke kásipkerler. Osylaısha, Aqmola oblysy halqynyń 90 paıyzy saqtandyrý júıesine engizildi», - dedi Kamaljan Nadyrov.

Osy rette, Berdibek Saparbaev mindetti áleýmettik medıtsınalyq saqtandyrý engizý arqyly densaýlyq saqtaý salasy júıesin qarjylandyrý kólemi artatynyn atap ótti.

«Búgingi jıi aıtylyp júrgen másele - medıtsınalyq qyzmet sapasy. Bul týraly BAQ-tardan estip, kórip te júrsizder. Osy baǵytta Úkimet tarapynan densaýlyq salasyna qyrýar qarjy bólinip keledi. Sondyqtan, ár dáriger qyzmetine adal bolyp, halyqqa sapaly qyzmet kórsetkeni mańyzy. Jalpy, keler jyldan bastap densaýlyq saqtaý júıesin qarjylandyrýda másele týyndamaýy kerek. Mindetti áleýmettik medıtsınalyq saqtandyrýdy engizý arqyly biz barlyq máseleni sheshýimiz kerek», - dedi vıtse-premer.

Sonymen qatar kezdesýde halyqty ýaqtyly dári-dármekpen qamtamasyz etý máselesi de aıtyldy.