Úkimet janar-jaǵarmaı máselesi boıynsha turaqty jumys komıssııasyn qurady

NUR-SULTAN. QazAqparat – Janar-jaǵarmaı baǵasy negizsiz kóterilgen jaǵdaıda tıisti den qoıý sharalaryn qabyldaý qajet. Bul týraly Úkimet otyrysynda QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Janar-jaǵarmaı baǵalaryn baqylaý jáne tapshylyǵyna jol bermeý jónindegi turaqty jumys komıssııasyn qurýdy Roman Vasılevıchke tapsyramyn. Ulttyq ekonomıka mınıstrligi Básekelestikti qorǵaý agenttigimen jáne ákimdiktermen birlesip, baǵa negizsiz kóterilgen jaǵdaıda tıisti den qoıý sharalaryn qabyldaýdy qamtamasyz etsin», - dedi Á.Smaıylov birinshi orynbasary Roman Sklıarǵa qarata.

Sondaı-aq Úkimet basshysy Indýstrııa mınıstrligi, «QazMunaıGaz» jáne «Qazaqstan temir joly» kompanııalary munaı óńdeý zaýyttarynan munaı ónimderin ýaqytyly jiberýdi qamtamasyz etý boıynsha sharalar qabyldaýy qajettigin basa aıtty.

«Sonymen qatar Tsıfrlyq damý jáne Energetıka mınıstrlikteri dızel otynyn satýdyń táýliktik lımıtterin baqylaý jónindegi aqparattyq júıeni tez arada jedeldetsin. Energetıka mınıstrligi óńir ákimdikterimen birlesip, egin oraǵy kezinde sharýalardy janar-jaǵarmaımen ýaqytyly qamtamasyz etý máselesin turaqty baqylaýda ustasyn», - dedi Álıhan Smaıylov.

Foto: primeminister.kz