Úkimet: Jańa jyl merekesinde halyqty jylýsyz qaldyrmaıyq
Osy aptada el Úkimeti Meshin jylyndaǵy sońǵy otyrysyn ótkizip, onda Mınıstrler kabınetiniń 2017 jylǵa arnalǵan zań jobalaý jumystary josparynyń jobasyn qarady. Sonymen qatar jylý berý maýsymyna qatysty jaıttar da pysyqtaldy.
Bul másele boıynsha negizgi baıandama jasaǵan Energetıka mınıstri Qanat Bozymbaevtyń aıtýynsha, jóndeý jumystary keste boıynsha júrgizilýde. 8 energııa blogynyń, 51 qazandyq pen 35 týrbınanyń jóndeý jumystary aıaqtaldy. 3 energııa blogynda, 3 qazandyq pen 7 týrbınada jóndeý jumystarynyń túrli kezeńi júrip jatyr.
«Elektr stansalarynyń otyn qoımalarynda 3 mln tonnadan astam kómir men 124 myń tonna mazýt jınaqtalǵan, bul jalpy bekitilgen normalarǵa sáıkes keledi. Alaıda, Petropavldaǵy «SoltústikQazEnergo» kompanııasynyń EJO-2, «Astana-Energııa» kásiporynynyń EJO-2, Qaraǵandydaǵy «Bassel Group LLS» kompanııasynyń MAES-1 qazandyqtarynda bul norma saqtalmaı otyr. Oǵan sebep ekspedıtorlyq kompanııalardyń kómir tasý úshin jartylaı vagondardy ýaqytyly bermeýi», - dedi ol.
Ákimdikterdiń ótinimderine sáıkes, Energetıka mınıstrligi 2016-2017 jylǵy kúzgi-qysqy kezeńde 342,6 myń tonna kóleminde áleýmettik-óndiristik nysandarǵa mazýtty jetkizý boıynsha aımaqtardy bekitý kestesin jasaǵan.
Alaıda, Premer-Mınıstr Baqytjan Saǵyntaev jylý maýsymy bastalǵaly beri «Arsellor Mıtallǵa» qarasty JES-2-de 17 apattyq jaǵdaıdyń bolǵanyn, búginde eki qazandyqtyń toqtap turǵanyna qaramastan taǵy bir qazandyqtyń isten shyqandyǵyn aıtty.
«Temirtaýlyqtardyń úılerinde aýa temperatýrasy 16 gradýstan joǵary kóterilmeıdi. Al aýa-raıy kúrt sýytyp ketkende 12 gradýsqa deıin túsip ketedi», - dedi Saǵyntaev.
Osy oraıda Qaraǵandy oblysynyń ákimi Nurmuxambet Ábdibekov ondaı jaǵdaıdyń bar ekenin moıyndady. Alaıda búginnen qaldyrmaı, bir qazandyqty, al erteń taǵy bir qazandyqty iske qosýǵa ýáde berdi. Aımaq basshysynyń aıtýynsha, eki kúnnen keıin temirtaýlyqtardyń úılerinde turaqty temperatýra ornaıtyn bolady.
«Jalpy, jylý maýsymy bastalǵaly beri Temirtaýda jylý berilmeı qalǵan kez birde-bir ret bolǵan joq. Iá, ázirshe temperatýralyq rejım tómen. Onyń barlyǵy qazandyqtardyń isten shyǵýyna baılanysty», - dedi Ábdibekov.
Degenmen, Úkimet basshysy ondaı jaýapqa qanaǵattanǵan joq. «Nurmuxambet Qanapııauly, 12 gradýstyq jylýdy berip jatyrmyz dep, maqtanýdyń qajeti joq dep oılaımyn. Ondaı jaǵdaıda jylý berilmeı qalǵan birde-bir kún bolmady deýdiń ózi durys emes. Nege birinshi qazandyqty jóndeý jumystary endi ǵana aıaqtalyp jatyr? Mınıstrlikter durys baqylamady ma? Apta saıyn selektorlyq otyrys ótkizemiz, ylǵı aıtamyz. Bizde energetıkalyq qadaǵalaý jáne taǵy basqa organdar bar. Basynda atústi qaraımyz da, jyldyń sońynda kináli adamdy izdeımiz. Aqyr sońynda xalyq qınalady. Osynyń bárin birden rettep alýǵa bolmady ma?», - dedi Saǵyntaev.
Osy oraıda Premer-Mınıstr eki kúnnen keıin Temirtaýdaǵy jylýdy qalpyna keltirý - jumystyń taǵy bir márte tekseriletinin eskertti.
«Qurmetti ákimder!. Óńirlerińizdegi jylý júıesine sizder tikeleı jeke jaýapty ekenderińizdi esterińizge salamyn. Buny únemi aıtyp júrmiz. Baıandamalaryńyzdy da tyńdap júrmiz. Degenmen, jylý jelisinde ártúrli apattar bolyp turady. Biraq, bárin baqylaýda ustaý kerek. Eń bastysy, Jańa jyl merekesinde halyqty jylýsyz qaldyrmaıyq. Halyq Jańa jyldy jyly úıinde qarsy alǵysy keledi. Sondyqtan, jylý berý maýsymynyń oıdaǵydaı ótýi úshin durys jaǵdaı jasaıyq. Ásirese, mereke kúnderi», - dedi osy máselege oraı Premer-Mınıstr Baqytjan Saǵyntaev.
Úkimet basshysy Jańa jylǵa qarsy qoǵamdyq tártipti, joldardaǵy qaýipsizdik pen ózge de jaǵdaılardy qatań baqylaý úshin búkil memlekettik organdarǵa jedel áreket etetin kezekshiler otyrýy qajettigin de qatań tapsyrdy.
«Іshki ister mınıstrligi búginnen bastap kúsheıtilgen rejimde jumys isteýge kirissin. Sondaı-aq, Jańa jyldyq merekeler ótetin oryndardy baqylaýǵa alý kerek. Ásirese, órt qaýipsizdigi nazarda bolsyn. Oblys ákimderi, Astana jáne Almaty qalalarynyń basshylaryna Іshki ister mınıstrligimen birge, aýa raıyn eskere otyryp, joldardaǵy avtokólikterdiń qaýipsizdigi úshin aldyn ala shara qoldanýdy tapsyramyn. Búkil memlekettik organdarda jedel áreket etetin kezekshi otyrýy kerek. Bul isti Asqar Mamın ózi baqylasyn», - dedi Saǵyntaev.
Qazaqstanǵa vızasyz kele alatyn elder qatary tolyqty
Aıtpaqshy, osy aptada Syrtqy ister mınıstri qyzmetin osymen támamdaǵan Erlan Ydyrysov Ortalyq kommýnıkatsııalar qyzmetinde arnaıy baspasóz máslıhatyn ótizip, ózi basshylyq jasaıtyn vedomstvonyń osy jylda atqarǵan jumystaryna egjeı-tegjeıli toqtalyp, 2017 jylǵy qolǵa alynatyn basym baǵyttar jaıyn da sóz etken bolatyn.
«Astanada ótetin «EKSPO-2017» halyqaralyq kórmesi men Almatyda ótetin qysqy «Ýnıversıada-2017» oıyndary qarsańynda sheteldik qonaqtar men ınvestorlardyń kelýin barynsha yńǵaıly etý maqsatynda QR Syrtqy ister mınıstrligi vızasyz rejimdi jeńildetý jáne mıgratsııalyq baqylaý men qaýipsizdik tıimdiligin arttyrý boıynsha jumysyn jalǵastyrady. Bir rettik iskerlik, jeke, sonymen qatar 48 ekonomıkalyq damyǵan elderdiń azamattary úshin bir rettik jáne eki rettik týrıstik vıza berý úderisi jeńildetilgen», - dep atap ótti ol.
Mınıstrdiń aıtýynsha, qazirgi tańda elimizge 19 memlekettiń azamattary vıza ashpaı-aq kele alady.
«2017 jyldyń 1 qańtarynan bastap 45 el azamattary, olardyń ishinde Ekonomıkalyq yntymaqtastyq jáne damý uıymy men Eýropalyq odaq músheleri, sonymen birge Birikken Arab Ámirligi, Malaızııa, Sıngapýr elderi jáne Monako Knıazdigi Qazaqstanǵa kirgennen bastap, 30 kúnge deıin elimizde vızasyz júre alady», - dedi E. Ydyrysov.
Onyń aıtýynsha, 2017 jyldyń 1 qańtarynan bastap kúshine enetin sheteldik azamattarǵa arnalǵan Qazaqstan Respýblıkasynyń vızasyn berý jáne shaqyrýlardy rásimdeýdiń jańa erejeleri ótken aptada dıplomatııalyq korpýs pen buqaralyq aqparat quraldary ókilderine usynyldy.
«Vıza rejimin yryqtandyrý maqsatynda qabyldanǵan sharalar bizdiń elimizdiń ulttyq múddesin eskere otyryp júrgiziletindigin atap ótkim keledi. Joǵaryda atalǵan memleketterden bólek taǵy 19 eldiń azamattary qol qoıylǵan ekijaqty kelisimderdiń negizinde vıza talaptarynan bosatylady. Mundaı kelisimderge basqa da memlekettermen qol qoıý úshin kelissózderdi jalǵastyra beretin bolamyz», - dedi syrtqy saıasat vedomstvosynyń basshysy.