Úkimet jalǵa beretin úılerde kópbalaly otbasylar qansha ýaqyt tura alady

NUR-SULTAN. QazAqparat - Indýstrııa jáne ınfraqurylymdyq damý birinshi vıtse-mınıstri Qaıyrbek Óskenbaev «Áleýmettik qamqorlyq» baǵdarlamasy boıynsha kópbalaly otbasylar jalǵa beriletin páterde qansha ýaqyt tura alatynyn aıtty, dep habarlaıdy QazAqparat tilshisi.

«Bizdiń turǵyn úı máselesine qatysty zań, shynynda da, áleýmettik baǵyttardy kózdeıdi. Bul bizdiń memlekettiń ıdeologııasy men saıasaty ekenin aıta ketý kerek. Sol sebepten, qandaı da bir shekteý qoıyp otyrǵan joqpyz. Máselen, bir otbasy jalǵa beriletin páterdi alatyn bolsa, qandaı da bir jasqa jetkenshe, qartaıǵansha tura alady degendeı shekteý joq», - deıdi Qaıyrbek Óskenbaev Úkimette ótken brıfıng barysynda.

Onyń aıtýynsha, bastapqy kelisimde jazylǵan bolsa, otbasy músheleri ol úıde ýaqyt shekteýinsiz tura alady.

«Eń bastysy - bizdiń zańdaǵy qujattarda JSN nómirimen tirkeýde turǵan azamattar páterdi ala alatyny týraly erejeler jazylatyn bolady. Esimin tirkep, jalǵa berilgen páterdi alǵan azamattar - qansha ýaqyt bolsa, sonsha tura berýine bolady. Olardy ol páterden eshkim kóshirip jibermeıdi. Olar jalǵa beriletin páterlerde jaǵdaıyn jaqsartqansha, basqa úıge kóshkisi kelgenshe tura beredi», - deıdi spıker.

Eske sala ketsek, atalmysh baspasóz máslıhatynda Qaıyrbek Óskenbaev bıyl 6 myń páter kópbalaly otbasylarǵa jalǵa beriletinin málim etken bolatyn. Onyń aıtýynsha, qazirgi tańda elimizde 31750 kópbalaly otbasy páter kezeginde tur.

«2025 jylǵa deıin qarajat tolyq kózdelgenin ózderińiz bilesizder. 40 myńnan astam páter salamyz dep otyrmyz. Bıyl jalǵa berilmeıtin jáne satylmaıtyn 6 myń páterdi tapsyramyz. Ol jumys bastalyp ketti», - deıdi vıtse-mınıstr.