Úkimet úıinde «Aýyl amanaty» jobalyq keńsesin qurý boıynsha keńes ótti

ASTANA. QazAqparat – Úkimet úıinde Premer-Mınıstrdiń orynbasary – Eńbek jáne halyqty áleýmettik qorǵaý mınıstri Tamara Dúısenovanyń tóraǵalyǵymen «Aýyl amanaty» jobalyq keńsesin qurý jóninde keńes ótti, dep habarlaıdy QazAqparat primeminister.kz-ke silteme jasap.

«Aýyl amanaty» jobalyq keńsesin qurýdaǵy maqsat – halyqtyń tabysyn arttyrýdyń 2029 jylǵa deıingi baǵdarlamasyn júzege asyrý barysyn jáne QR aýyldyq aýmaqtaryn damytýdyń 2023-2027 jyldarǵa arnalǵan tujyrymdamasyn baqylaý.

Atalmysh sharaǵa Amanat partııasynyń hatshysy Eldar Jumaǵazıev qatysyp, Jobalyq keńseniń respýblıkalyq, oblystyq, aýdandyq jáne aýyldyq deńgeıdegi dekompozıtsııasyn, sonymen qatar aýyldardy taldaýdy, aýyldyq okrýgterdiń mamandanýyn, tehnologııalyq kartalardy, kooperatsııalardy qurýdy jáne taǵy basqany tanystyrdy.

«Ekonomıkalyq zertteý ınstıtýty» AQ basqarma tóraǵasy Rýslan Sultanov halyqtyń tabysyn arttyrý baǵdarlamasynyń, aýyldyq aýmaqtardy damytý tujyrymdamasynyń jáne «Aýyl amanaty» jobasynyń júzege asyrylýyn baqylaý boıynsha oıymen bólisti.

Sondaı-aq jıynda «Yevniy consulting group» kompanııasynyń dırektory Arman Evnıevtiń jáne Amanat partııasy sarapshylarynyń pikirleri tyńdaldy.

Talqylaý qorytyndysy boıynsha Premer-Mınıstrdiń orynbasary Jobalyq keńseni qurýdy, onyń Erejesin ázirleýdi jáne kadrlyq quramdy anyqtaýdy tapsyrdy.