Úkimet úshem dúnıege ákelgen ata-anany kezeksiz baspanamen qamtý máselesin qoldaıdy
Eske sala keteıik, qujat Senattyń jalpy otyrysynda birinshi oqylymda maquldanǵan bolatyn. Jalpy, zań jobasy boıynsha turǵyn úı qatynastary salasynda ákimshilik quqyq buzýshylyqtardyń jańa quramdary engiziledi. Memlekettik turǵyn úı alýǵa úmitker adamdardyń tobyn anyqtaı maqsatynda «bıýdjettik uıymdar» uǵymy engiziledi. Sonymen qatar, ýákiletti organdardyń turǵyn úıge qoıylatyn tehnıkalyq talaptary boıynsha quzyretin anyqtaý qarastyrylyp, kondomınıým nysanyn basqarý organdary qyzmetiniń ashyqtyǵyn qamtamasyz etý kózdeledi.
Toqtala ketetin jaıt, zań jobasynda kóp balaly otbasylardyń memlekettik turǵyn úı qorynan baspana alǵanǵa deıin olardyń kezegin saqtaý, Uly Otan soǵysynyń qatysýshylary men múgedekterine jáne solarǵa teńestirilgen adamdarǵa beriletin jeńildikter men olardy áleýmettik qorǵaý, jetim balalardyń, ata-analarynyń qamqorlyǵynan aıyrylǵan balalardyń turǵyn úıge sózsiz quqyǵyn saqtaı otyryp, olardyń arasynda páterler bólý úshin eń kemi jıyrma paıyzdyq kvota bekitý týraly usynystar da qabyldanǵan.
Ulttyq ekonomıka vıtse-mınıstri Qaıyrbek Óskenbaevtyń aıtýynsha, Úkimet Astana men Almaty qalalaryn qospaǵanda memlekettik turǵyn úı qorynan baspana alý úshin kezekte turýǵa qatysty qalalarda turý merzimin tómendetý týraly senatorlardyń usynysyn qoldaǵan. Sonymen qatar, birinshi oqylym barysynda depýtat Qýanysh Aıtahanov kóp balaly otbasylarǵa, úshemderdi dúnıege ákelgen ata-anaǵa baspanany kezeksiz berý týraly bastama kótergen bolatyn. «Baspanany «Altyn alqa» belgisin ıelengen kóp balaly analarǵa birinshi kezekte, sonymen qatar, úshemderdi dúnıege ákelgenderge baspanany kezeksiz berýge qatysty máseleni Úkimet ishinara qoldap otyr. Bul rette atalǵan sanattaǵy tulǵalardy baspanamen qamtý quqyǵyn jergilikti atqarýshy organdarǵa jergilikti bıýdjet esebinen qamtamasyz etýge berý usynylady», - dedi Qaıyrbek Óskenbaev.