Úkimet úsh jylda «Samuryq-Qazynaǵa» 212 mlrd teńge baǵyttamaqshy

ASTANA. QazAqparat – Ulttyq ekonomıka mınıstrligi 2023-2025 jyldarǵa arnalǵan bıýdjeti týraly anyqtama jarııalady, dep habarlaıdy QazAqparat tilshisi.

Anyqtamadaǵy málimetke súıensek, vedomstvonyń úsh jyldyq bıýdjeti 1 trln 162,9 mlrd teńge bolmaq.

Onyń ishinde:

- 2023 jyly – 709,4 mlrd teńge;

- 2024 jyly – 231,6 mlrd teńge;

- 2025 jyly – 221,8 mlrd teńge ıgerý kózdelgen.

Bul shyǵystar úsh strategııalyq baǵytty iske asyrýǵa jumsalýy kerek:

- Qazaqstan ekonomıkasynyń básekege qabiletin arttyrý úshin úsh jylǵa 718,3 mlrd teńge qarastyrylǵan.

- Óńirlerdiń áleýmettik-ekonomıkalyq áleýetin damytý úshin úsh jylǵa 412,5 mlrd teńge bólý josparlanyp otyr.

- «Qupııa» shyǵystarǵa úsh jylda 1,8 mlrd teńge jumsaý kózdelgen.

Qujatta qalǵan 30,3 mlrd teńge strategııalyq baǵyttan tys shyǵyndarǵa jumsalatyny aıtylǵan.

«Qazaqstan ekonomıkasynyń básekege qabiletin arttyrý» dep atalatyn birinshi strategııalyq baǵytqa úsh jylda jumsalatyn 718,3 mlrd teńgeniń 212,1 mlrd teńgesi «Samuryq-Qazynaǵa» baǵyttalmaq.

Naqtyraq aıtsaq, 162,6 mlrd teńge «Samuryq-Qazyna» ulttyq ál-aýqat qory» AQ-ǵa ulttyq ekonomıkanyń básekege qabileti men ornyqtylyǵyn qamtamasyz etý úshin beriletin kredıtke bólinedi.

Al 49,5 mlrd teńge «Samuryq-Qazyna» ulttyq ál-aýqat qory» AQ jarǵylyq kapıtalyn ulǵaıtýǵa jumsalmaq.