Úkimet, Ulttyq bank jáne QNRDA Makroekonomıkalyq saıasatty úılestirý týraly kelisim jasady

NUR-SULTAN. QazAqparat - Premer-Mınıstri Asqar Mamınniń tóraǵalyǵymen ótken Úkimet otyrysynda Úkimet, Ulttyq bank jáne Qarjy naryǵyn retteý jáne damytý agenttigi (QNRDA) arasyndaǵy 2021-2023 jyldarǵa arnalǵan makroekonomıkalyq saıasat sharalaryn úılestirý týraly kelisim qaraldy, dep habarlaıdy QazAqparat.

Premer-Mınıstr atalǵan kelisim Úkimet pen qarjy retteýshileriniń kelisilgen is-qımyldaryn qazirgi jaǵdaılarda qamtamasyz etýge múmkindik beretinin atap ótti. «Halyqtyń turmys deńgeıi men ál-aýqatyn arttyrý – elimizdiń áleýmettik-ekonomıkalyq saıasatynyń negizgi basymdyǵy. Ol úshin aqsha-nesıe, salyq-bıýdjet jáne qurylymdyq saıasattardy, sondaı-aq qarjy sektoryn damytý saıasatyn úılestirý qamtamasyz etiledi», — dedi A. Mamın. Birlesken sharalardy iske asyrý úsh baǵyt boıynsha júzege asyrylatyn bolady. «Makroekonomıkalyq turaqtylyqty arttyrý» baǵyty aıasynda tómen ınflıatsııa, qarjy júıesiniń turaqtylyǵy men ekonomıkanyń ósýi arasyndaǵy teńgerimdi qamtamasyz ete otyryp, iskerlik belsendilikti yntalandyrý boıynsha sharalar qabyldanady. Inflıatsııany birtindep tómendetý jáne ony ornyqty ekonomıkalyq ósimge yqpal etetin tómen deńgeıde saqtaý jónindegi jumys jalǵastyrylatyn bolady. «Qarjy naryǵyn damytý» ekinshi baǵytyn iske asyrý Qarjy sektoryn damytýdyń 2030 jylǵa deıingi tujyrymdamasyn qabyldaýdy kózdeıdi. Qarjy júıesiniń turaqtylyǵyn jáne ekonomıkanyń ósýin qamtamasyz etý qajettiligin eskere otyryp, naryqtyq tetikter negizinde ekonomıkany banktik kredıtteýdi edáýir keńeıtý jóninde sharalar qabyldanatyn bolady. «Ekonomıkalyq ósimniń uzaq merzimdi áleýetin arttyrý» úshinshi baǵyty aıasynda básekege qabiletti shıkizattyq emes sektorǵa negizdelgen ekonomıkanyń jańa qurylymyn qalyptastyrýdy yntalandyrý, qosylǵan qunnyń óńirlik jáne jahandyq tizbekterine endirý boıynsha jumys jalǵasady. Proaktıvti syrtqy saýda saıasatyn júrgizý, sondaı-aq ınvestıtsııalardyń jańa tolqynyn tartý jalǵastyrylady. «Ekonomıkanyń sapaly jáne ornyqty damýy úshin túbegeıli jańa ınstıtýtsıonaldyq jaǵdaı jasalynady. Ol jańa ekonomıkalyq jaǵdaıda halyqtyń turmys sapasy men ál-aýatynyń artýyna yqpal etedi», — dedi A. Mamın. Premer-Mınıstr barlyq múddeli memlekettik organdarǵa Kelisim is-sharalarynyń belgilengen merzimde sapaly oryndalýyn qamtamasyz etýdi tapsyrdy.