Úkimet Túrkistan oblysyndaǵy ınvestıtsııalyq jobalarǵa qosymsha 9,1 mlrd teńge bóledi

ASTANA. QazAqparat – Úkimet Túrkistan oblysyndaǵy ınvestıtsııalyq jobalarǵa buǵan deıin bólgen 5,4 mlrd teńgeniń ústine qosymsha 9,1 mlrd teńge bóletin boldy, dep habarlaıdy Qazaqparat tilshisi.

Bul týraly Premer-Mınıstr Álıhan Smaıylov Senat depýtattarynyń saýalyna joldaǵan jaýabynda aıtty.

«2023 jylǵa bekitilgen respýblıkalyq bıýdjette Túrkistan oblysynyń ınvestıtsııalyq jobalaryn iske asyrýǵa 5,4 mlrd teńge somasynda shyǵystar kózdelgen. 2023 jylǵa arnalǵan respýblıkalyq bıýdjetti naqtylaý sheńberinde Respýblıkalyq bıýdjet komıssııasynyń 2023 jylǵy 28 aqpandaǵy № 5 sheshimimen oblystyń ınvestıtsııalyq jobalaryn iske asyrýǵa 9,1 mlrd teńge somasynda qosymsha shyǵystar qoldaý tapty», - dep jazylǵan jaýapta.

Úkimet basshysynyń aıtýynsha, bul qarajat birneshe jobaǵa jumsalmaq.

«Ákimshilik iskerlik ortalyqta ınjenerlik ınfraqurylym salýǵa – 6 mlrd teńge, muz saraıyn salýǵa jáne «Áziret-Sultan» mýzeı-qoryǵynyń aýmaǵyn abattandyrýǵa – 2,5 mlrd teńge, Saýran aýdanynda ákimshilik ǵımarattar salýǵa - 0,6 mlrd teńge. Túrkistan oblysynyń jobalaryn odan ári qarjylandyrý máselesi 2024 - 2026 jyldarǵa arnalǵan respýblıkalyq bıýdjettiń jobasyn qalyptastyrǵanda kezeńdik tártippen qaralatyn bolady», - delingen jaýapta.