Úkimet Stepnogorsk qalasyn damytýdyń keshendi josparyn qabyldady

KÓKShETAÝ. QazAqparat - Aqmola oblysynyń ındýstrııalyq ortalyǵy Stepnogorsk qalasy jańa serpinmen odan ári damymaq. QR Úkimeti qalany áleýmettik-ekonomıkalyq damytýdyń 2023-2027 jyldarǵa arnalǵan keshendi josparyn bekitti, dep habarlaıdy QazAqparat.

Jospar Memleket basshysynyń tapsyrmalaryn iske asyrý maqsatynda ázirlendi jáne áleýmettik qamsyzdandyrýdyń negizgi máselelerin sheshýge, sondaı-aq halyqtyń ómir súrý sapasyn arttyrýǵa baǵyttalǵan.

Qujatta densaýlyq saqtaý, bilim berý, sport nysandarynyń qurylysy, ınjenerlik ınfraqurylymdy qaıta jańǵyrtý, ekonomıkanyń naqty sektoryn, ónerkásipti, AÓK, shaǵyn jáne orta bıznesti damytý, halyqty jumyspen qamtý, t. b. boıynsha 83 shara kórsetilgen.

2027 jylǵa deıin Jospardy iske asyrýǵa shamamen 107 mlrd teńge bólý josparlanǵan, onyń ishinde 62 mlrd teńgeden astamy jeke ınvestıtsııalar esebinen bolmaq.

Shyǵyndardyń basym bóligine (58,3 mlrd teńge) tirshilikti qamtamasyz etetin ınfraqurylymdy damytý jáne tozýyn azaıtý (23 joba) qarastyrylǵan. Atap aıtqanda, jeke ınvestıtsııalar esebinen jylý elektr ortalyǵyn kúrdeli jóndeýden ótkizý josparlanǵan.

Josparǵa sáıkes, 2027 jylǵa qaraı qalada ónerkásiptik óndiris kólemi 550 mlrd teńge deńgeıinde qamtamasyz etilse, óńdeýshi sektor ónimi keminde 70% bolmaq. Jalpy aýyl sharýashylyǵy óniminiń kólemi 10%-ǵa artady.

Qujatta jumyspen qamtý máselesi, ásirese jastardy jumyspen qamtýǵa jáne kásiporyndardaǵy kadr tapshylyǵy máselesin sheshýge erekshe kóńil bólingen. Densaýlyq saqtaý salasynda medıtsınalyq kolledj ashý arqyly kadrlyq áleýetti arttyrý josparlanǵan. Sondaı-aq kórsetiletin medıtsınalyq qyzmettiń jaqsarýyna ortalyq qalalyq aýrýhanany kúrdeli jóndeýden ótkizý jáne tehnıkalyq jabdyqtaý áser etpek.

Sonymen qatar ekologııalyq problemalardy sheshý sharalary josparlanǵan. Atap aıtqanda, atmosferaǵa lastaýshy zattardyń shyǵaryndylaryn azaıtý (9,8 myń tonnaǵa deıin), ónerkásiptik kásiporyndardyń qorshaǵan ortany qorǵaý boıynsha mindettemelerin oryndaýda jaýapkershiligin arttyrý sharalary bar.

Jaqsy jáne qanaǵattanarlyq jaǵdaıdaǵy joldar úlesin belgilengen merzimge deıin 74%-dan 90%-ǵa deıin arttyrý josparlanǵan.

Eske salaıyq, Stepnogorsk qalasy men oǵan irgeles aımaqtardyń aýmaǵy 290 myń gektardan astam, halyq sany – 68,5 myń adam. Qalanyń ákimshiligine bir aýyldyq okrýg jáne 9 eldi meken – 4 kent, 5 aýyl kiredi. Ónerkásip salasy qala ekonomıkasynyń draıveri bolyp tabylady. Aqmola oblysynyń ónerkásip óndirisindegi Stepnogorsk qalasynyń úlesi – 25,3%.