Úkimet sán-saltanatqa salyq salamyn dep, orta býynǵa aýyrtpashylyqty arttyrýǵa shaq qaldy - S. Jalmaǵambetova

ASTANA. 14 qarasha. QazAqparat - Úkimet sán-saltanatqa salyq salamyn dep aıtyp, orta býynǵa aýyrtpashylyqty arttyrýǵa shaq qaldy. Búgin Senattyń jalpy otyrysynda depýtat Svetlana Jalmaǵambetova osylaı málim etti. Eske salsaq, jıyn barysynda «Qazaqstan Respýblıkasynyń keıbir zańnamalyq aktilerine salyq salý máseleleri boıynsha ózgerister men tolyqtyrýlar engizý týraly» zań jobasy talqylanǵan bolatyn.

Sóz arasynda senator orta býynǵa kúsh túspeýi kerektigin alǵa tartty. Óıtkeni, dál osy orta býyn el damýynyń turaqtylyǵy men ornyqtylyǵyn aıqyndaıdy. Orta býyn kóp bolǵan saıyn memleket te ornyqty damı túsedi.

«Úkimet osy joly sán-saltanatqa salyq salamyn dep aıtyp, is júzinde orta býynǵa aýyrtpashylyq arta salmaq boldy. Sóıtip, endi ǵana jaıly ómir súre bastaǵan qazaqstandyqtar, ıpoteka arqyly baspanaǵa ıe bolyp, 100-150 sharshyny quraıtyn úı-jaılarǵa qoly endi jete bastaǵanda salyqqa qatysty taǵy qysyltaıańdy bastan keshetin edi. Máselen, Astanada 155 sharshy metrdi quraıtyn jańa páterge qazirgi norma boıynsha múlik salyǵy 17 myń teńge. Al Úkimet usynǵan nusqada 178 myń teńge kórsetilgen. 10 esege artyq! Bul - óte úlken soma. Álgindeı páterge ıe qazaqstandyqtardyń barlyǵy ony tóleı de almas edi», - dedi senator.

Bul rette Májilistegi áriptesterine alǵysyn bildirgen senator, Úkimet usynǵan nusqa Májiliste barynsha ózgertilip, orta býynǵa túsetin aýyrtpalyq birshama jeńildegenin aıtty. Buny Elbasy da qýattaǵan.

«Májilistegi nusqa boıynsha endi álgi 155 sharshy metrlik páterge Úkimet kórsetkendeı emes 178 myń teńge emes, 35 myń teńge shamasynda salyq tólenedi. Sonymen qatar, aýyldy eldi mekenderge salyq ózgerip otyrǵan joq», - dedi S. Jalmaǵambetova.