Úkimet pılotsyz ushatyn apparattardyń qozǵalysyn retteıtin jańa qaýly shyǵardy

NUR-SULTAN. QazAqparat – QR Úkimetiniń pılotsyz ushatyn apparattardyń qozǵalysy retteıtin jańa qaýlysy shyqty, dep habarlaıdy QazAqparat tilshisi.

Qujat QR Premer-Mınıstriniń resmı saıtynda jarııalandy.

Qaýlynyń burynǵy nusqasynan aıyrmashylyǵy - pılotsyz ushatyn apparattyń qozǵalysy kezinde saqtalatyn araqashyqtyqqa qoıylatyn talaptar ózgergen.

«82-2-tarmaq mynadaı redaktsııada jazylsyn», -delingen qaýlyda.

Sonymen pılotsyz ushatyn apparattarynyń ushýy:

1) G synybyndaǵy áýe keńistigi shekarasy sheginde meteorologııalyq mınımýmdy saqtaý (kóldeneńinen keminde 1500 metr kóriný jáne tiginen keminde 300 metr bulttyń tómengi shekarasy) shartymen;

2) baqylanatyn áýe keńistiginde áýe qozǵalysyn basqarý ortalyqtarynyń qysqa merzimdi shekteýlerdi engizý shartymen oryndalady.

Qysqa merzimdi shekteýler 50 metr bıiktikke deıin jer bederinen sozylyp jatqan áýe keńistiginde pılotsyz ushý apparattarynyń ushýyn qamtamasyz etý úshin belgilenbeıdi;

3) dıspetcherlik aımaqta – jaýapkershilik aımaǵynda osyndaı áýeaılaq ornalasqan jáne áýe qozǵalysyn basqarý ortalyǵy qysqa merzimdi shekteý engizgen jaǵdaıda, áýe qozǵalysyna qyzmet kórsetý organymen kelisilgennen keıin barlyq bıiktikte oryndalatyn pılotsyz ushý apparattarynyń avıatsııalyq jumystardy jáne demonstratsııalyq ushýdy oryndaýyn (aeroshoý) qospaǵanda, jer betinen 50 metr bıiktikke deıin jaıylǵan jáne áýeaılaq qorshaýynan nemese shekarany kórsetetin tańbalanǵan belgilerden 5,5 km alys ornalasqan áýe keńistiginde oryndalady.

Qaýlynyń burynǵy redaktsııasyndaǵy 82-3, 82-4 jáne 82-5-tarmaqtar alynyp tastalatyny da aıtylǵan.

Bul tarmaqtarda pılotsyz ushatyn apparatty qoldaný kezinde ony tizgindegen tulǵanyń basqa adamdardan qansha aralyq saqtaý qajettigi kórsetilgen bolatyn.