Úkimet pen «Nur Otan» bir adamdaı jumyla jumys isteýi kerek - Keńes Muqyshev

PETROPAVL. QazAqparat - Astana qalasynda ótken « Nur Otan» partııasynyń XVIII sezine SQO-dan 50 delegat qatysty. Delegatsııa quramyna qoǵam qaıratkerleri, úkimettik emes uıym ókilderi, partııa belsendileri, aýmaqtyq fılıaldar basshylarynyń birinshi orynbasarlary kirdi, dep habarlaıdy QazAqparat tilshisi.

"Nur Otan" partııasy Petropavl qalalyq fılıaly tóraǵasynyń birinshi orynbasary Keńes Muqyshevtiń aıtýynsha, onyń bul jıynnan alǵan áseri zor. Basty túıgeni - "Nur Otan" partııasynyń jergilikti jerdegi fılıaldary budan bylaı Úkimet pen halyqty baılanystyratyn kópir ispettes bolýy kerek.

«Prezıdent N.Nazarbaev alǵashqy sózin burynǵy Úkimetti nege taratqandyǵy týrasynan bastady. Mysaly, buryn bılik pen qarapaıym halyqtyń arasynda baılanys bolǵan joq. Úkimet qoıylǵan maqsattarǵa jete almady. Sondyqtan Elbasy Úkimetti taratý týraly sheshim qabyldady. Jańa Úkimet 70 % jańa quramda jumys isteıdi», - deıdi "Nur Otan" partııasynyń Petropavl qalalyq fılıaly tóraǵasynyń birinshi orynbasary Keńes Muqyshev.

Sondaı-aq, ol kóp balaly analar, az qamtylǵan otbasylar máselesiniń qozǵalýyn kútkenin aıtty.

«Prezıdent Úkimetke naqty mindetter júktedi. Solardyń biri - az qamtylǵan kópbalaly otbasynyń ár balasyna 21 myń teńgeden áleýmettik kómek kórsetý. Bizge qabyldaýǵa kómek surap kóptegen adamdar keledi. Mysaly, ótken aptada kóp balaly ana muń- muqtajymen bólisti. Onyń otbasynda 6 bala bar. Eń kishkentaıy 1 jastan asty, sondyqtan ol endi 21 myń teńge járdemaqy ala almaıdy. Onyń qazirgi kópbalaly ana retinde aı saıynǵy kirisi nebary - 10,005 teńge ǵana. Odan basqa eshqandaı kirisi joq. Kómekteseıik desek, onyń úıi joq. Petropavl qalasyna tirkelgen, biraq ózi Shahovskoe eldimekeninde úı jaldap turyp jatyr. Sol sebepti ol ataýly áleýmettik kómekti ala almaıdy. Qazirgi zańnamaǵa sáıkes AÁK alatyn adam mindetti túrde tirkeý boıynsha turýy qajet. Biz ondaı adamdarǵa kómektese almaımyz, óıtkeni, zańdy buza almaımyz. Biz tek azyq-túlik aparyp berýmen shekteldik. Osyndaı zańdaǵy olqylyqtardy depýtattar kelgende kóterip otyrýymyz kerek», - dedi Keńes Muqyshev.

Sondaı-aq, "Nur Otan" partııasynyń Petropavl qalalyq fılıaly tóraǵasynyń birinshi orynbasary Elbasy júktegen mindetterdi qalaı júzege asyrý kerektigine toqtaldy.

«Sezde birqatar ózekti máseleler qaraldy. Elbasymyz kóptegen mindetter júktedi. Endi sony júzege asyrý úshin Úkimet pen biz - nurotandyqtar bir adamdaı jumys isteýimiz kerek. Biz - halyqtyń kóńil-kúıin kórsetetin fýnktsııany atqaramyz», - dep túıindedi sózin.