Úkimet pen mınıstrlikter Túrkistan oblysynyń qalyptasýyna nazar aýdarsyn - N.Nazarbaev
«Ózderińiz de biletindeı, osy jyldyń shilde aıynda Shymkent qalasyna respýblıkalyq mańyzy bar qala mártebesi berilip, jańa Túrkistan oblysy quryldy. Qasıetti Túrkistan qalasynda jańa oblys ortalyǵynyń qurylýy derbes ákimshilik ortalyq retindegi óńirdiń tarıhı mániniń qaıta órleýiniń belgisi sanalady. Úkimet pen mınıstrlikter oblys ortalyǵynyń qurylysyna, qalyptasýyna laıyqty nazar aýdarýlary tıis. Qazaqstandaǵy bıznes te bul jumystarǵa aralasýy qajet. Men de ol jaqqa barmaqpyn, basshylarmen birlesip, mán-jaıdy talqylaıtyn bolamyz. Taıaý ýaqytta damyǵan jańa oblys ortalyǵy, ekonomıkamyz ben bıznesimizdiń jańa ósim núktesi paıda bolaryna senimdimin», - dep atap ótti Elbasy.
Qazaqstan Prezıdenti oblys ortalyǵynyń Túrkistanǵa kóshirilýi áleýmettik-ekonomıkalyq turǵydan ǵana emes rýhanı jaǵynan da asa mańyzy bar ekenin basa aıtty.
«Ol elimizdiń eń kıeli jerleriniń biri. Tarlan tarıhymyzda talaı taǵdyrly sheshimder osynda qabyldanǵan. Esimderi el tarıhynda máńgi jazylǵan birtýar tulǵalarymyz osynda jaı tapqan. Halyq tyǵyz qonystanǵan tutas ońtústiktik óńirdiń damýy jańa oblys ortalyǵynyń jumysyn tıimdi uıymdastyrýǵa baılanysty. Sondyqtan Úkimet pen ákimshilik bul jerde tyǵyz jumys isteýi kerek. Sonymen birge respýblıkalyq mańyzy bar qala mártebesin ıelengen Shymkenttiń tynys-tirshiligi de nazarda bolýy tıis»,- dedi Nursultan Nazarbaev.
QR Prezıdentiniń atap ótýinshe, taıaý ýaqytta Parlament qaraýyna jańadan qurylǵan ákimshilik-aýmaqtyq birliktiń tolyqqandy jumysyn qamtamasyz etýge baǵyttalǵan zań jobasy engiziletin bolady.
Aıta keteıik, búgin Astanada Memleket basshysy Nursultan Nazarbaevtyń qatysýymen QR Parlamenti palatalarynyń birlesken otyrysy ótip jatyr.
Jıyn barysynda Prezıdent 2019 jyldyń 1 qańtarynan bastap jalaqysy tómen azamattardyń tabys salyǵy 10 esege azaıatyndyǵyn aıtty.
Sondaı-aq Elbasy quzyrly organ ókilderine turǵyn úı-kommýnaldyq sharýashylyq salasynda qalyptasqan máselelerdi sheshýdi tapsyrdy.