Úkimet otyrysynda elimizde jekeshelendirý máseleleri talqylandy
Ulttyq ekonomıka mınıstrliginiń málimetinshe, bıyl 280 uıym satýǵa shyǵarylady. Onyń ishinde, «Samuryq-Qazyna» ál-aýqat qorynyń qaramaǵyndaǵy iri otandyq kompanııalar aktıvin IPO/SPO-ǵa 2019-2020 jyldary shyǵarý josparlanǵan.
Bul rette Úkimet basshysy jekeshelendirý nysandaryn ótkizýdiń jańa kesteleri qaıta bekitilgenin, sondaı-aq ár nysan boıynsha jol kartalary olardy ótkizýdiń naqty merzimderimen Memlekettik múlik tizilimine engizilgenin atap ótti. Osyǵan baılanysty memlekettik organdarǵa jáne holdıngterge bekitilgen kestelerdi naqty saqtaýdy qamtamasyz etý qajet. Sondaı-aq, búginde memlekettik menshikte qalýy tıis nysandar tizimin jasaý boıynsha jumys júrgizilýde. Oǵan qosa, «Yellow Pages» qaǵıdalaryna sáıkes kelmeıtin júzden astam nysan jekeshelendirýge jatatyn nysandar tizimine qosymsha engiziledi.
Memlekettik menshiktegi qalǵan nysandar jabylýy nemese qaıta uıymdastyrylýy tıis. Osyǵan baılanysty Úkimet basshysy memlekettik organdarǵa, ákimdikterge jáne ulttyq holdıngterge aǵymdaǵy jyldyń sońyna deıin atalǵan jumysty aıaqtaýdy tapsyrdy. Premer-mınıstr Úkimettiń keńeıtilgen otyrysynda Memleket basshysy memlekettik qatysýy bar barlyq nysandardy olardy básekeli ortaǵa berý maqsatynda túgendeýdi tapsyrǵanyn eske saldy. Ulttyq ekonomıka mınıstrligi júrgizgen jumys qorytyndysy boıynsha básekeli ortaǵa berýge tıisti nysandardyń tizimi ózektendirildi. Sol sebepti jaýapty memlekettik organdarǵa osy baǵyttaǵy aldaǵy jumysty baqylaýda ustaý qajet.
Bıyldan bastap elimizde qajetti kásipter men kásipkerlik negizderi daǵdylaryna jappaı oqytý men úıretýdi, nesıelendirý arqyly jappaı kásipkerlik úshin jaǵdaılar týdyrýdy, jumysqa ornalastyrýǵa yqpal etý jáne eńbekke jumyldyrýdy qoldaýdy qarastyratyn Ónimdi jumyspen qamtý jáne jappaı kásipkerlikti damytý baǵdarlamasy júzege asyrylýda. Otyrystyń ekinshi bóliginde osy baǵdarlamany iske asyrý barysy talqylandy. Eńbek jáne halyqty áleýmettik qorǵaý mınıstri Tamara Dúısenovanyń aıtýynsha, baǵdarlamaǵa jyl basynan beri 80 myń adam qatysypty. Onyń ishinde 75 myńy, ıaǵnı 94%-i jumyssyzdar, ózin-ózi jumyspen qamtyǵandar - 5 myń, ıaǵnı 6%. Baǵdarlamany júzege asyrý aıasynda 48 myńnan astam adam jumysqa ornalastyryldy. Taǵy 31 myń adam jumyspen qamtý ortalyqtary arqyly jumys berýshilermen bos jumys oryndaryna jumysqa ornalasty, dedi T.Dúısenova.
Sondaı-aq mınıstr jyl basynan beri áleýmettik jumys oryndaryna 12,4 myń adam ornalastyrylǵanyn, 28,1 myńnan astam qazaqstandyq qoǵamdyq jumystarǵa jiberilgenin, 7,6 myń jas maman jastar is-tájirıbesine qamtylǵanyn jetkizdi. Jalpy, baǵdarlamany júzege asyrýǵa 2017 jyly 85,3 mlrd. teńge qarastyrylǵan.
Bıyl 21 myńnan astam jas qazaqstandyqty tehnıkalyq jáne kásiptik bilimmen qamtý josparlanyp otyr. Bul oraıda memleket olardyń oqý aqysyn, sondaı-aq shákirtaqy tóleıdi, jol aqysy men turǵylyqty jerleriniń aqysyn óteıdi, sonymen qatar bir mezgil ystyq tamaqpen qamtamasyz etedi. Oqytý elektr-gaz dánekerleýshi, aspaz, jóndeýshi slesar, elektr monteri, mal dárigeri, esepshi, elektrık, montajshy, tiginshi sııaqty mamandyqtar boıynsha júrgiziledi.