Úkimet otyrysy bir mınýt únsizdikpen bastaldy

ASTANA. QazAqparat – Premer-Mınıstr Álıhan Smaıylov Abaı oblysyndaǵy órtte qaza tapqandardyń jaqyndaryna kóńil aıtty, dep habarlaıdy QazAqparat tilshisi.

Úkimet otyrysy bir mınýt únsizdikpen bastaldy.

«Ózderińiz biletindeı, alapat órt shyǵyp, birqatar eldi mekenge qaýip tóndirdi. Turǵyndar evakýatsııalandy. Semeıde jergilikti aýqymdaǵy tótenshe jaǵdaı rejımi jarııalandy. Órt sóndirý sharalaryn baqylaý úshin Memleket basshysy shetelge saparyn toqtatty. Úılestirý shtabynyń otyrystary únemi ótkizilip turady.

Ókinishke oraı, adamdar qaza tapty, biz orman órtine qarsy turǵan 14 adamnan aıyrylyp qaldyq. Úkimet atynan qaza tapqandardyń týystary men jaqyndaryna kóńil aıtamyz. Bir mınýt únsizdikpen marqumdardyń rýhyna taǵzym etýdi usynamyn», - dedi Úkimet basshysy.

Eske salaıyq, 8 maýsym kúni tutanǵan «Semeı» ormany rezervatyndaǵy órtpen kúreske jumyldyrylǵan 14 ormanshy qaza bolǵan edi. Abaı oblysy ákiminiń orynbasary Dımıtrıı Garıkovtyń aıtýynsha, órt 2 ret túsken naızaǵaıdan tutanǵan.

Prezıdent Qasym-Jomart Toqaev jumys saparymen Abaı oblysyna bardy.

12 maýsym elimizde Aza tutý kúni bolyp jarııalandy.

Alapat órtpen kúres áli júrip jatyr. Úkimet qaza bolǵan ormanshylardyń otbasylaryna qandaı qoldaý sharalary kórsetiletinin málim etti.