Úkimet Nashaqorlyqqa jáne esirtki bıznesine qarsy 2025 jylǵa deıingi keshendi jospardy qabyldady
Bul týraly búgin óziniń Telegram-paraqshasynda QR Memlekettik keńesshisi Erlan Qarın jazdy, dep habarlaıdy QazAqparat.
Memleket basshysy byltyrǵy qyrkúıek aıyndaǵy Joldaýynda osyndaı jospar ázirleý jóninde tapsyrma bergen edi. Prezıdent óziniń Saılaýaldy baǵdarlamasynda sıntetıkalyq esirtkiniń taralýyna qarsy kúresti mańyzdy basymdyqtardyń biri retinde belgiledi.
Mundaı jospar 2016 jyldan beri bolmaǵanyn aıta ketken jón. Bul esirtkige qarsy kúrestiń tıimdiligine teris áserin tıgizdi.
Sondyqtan byltyr Prezıdent janyndaǵy Jastar saıasaty jónindegi keńes sıntetıkalyq esirtkiniń taralýy máselesin alǵashqylardyń biri bolyp kóterip, qoǵam nazaryn aýdardy.
Parlament Májilisiniń jańa shaqyrylym depýtattary da esirtki problemasyn aıtyp, alańdaýshylyqtaryn bildirip, depýtattyq saýal joldady.
Prezıdent Túrkistandaǵy Ulttyq quryltaıda sóılegen sózinde jastar arasynda esirtkiniń taralýyn ult saýlyǵyna qaýip tóndiretin kesel dep atady. Memleket basshysy bul máseleni aıryqsha baqylaýda ustaıtynyn aıtty.
Qabyldanǵan Keshendi jospar sarapshylar arasynda, sonyń ishinde Jastar saıasaty jónindegi keńeste de keńinen talqylandy. Qujattaǵy jańa tetikter men quraldar, eń aldymen, nashaqorlyqtyń aldyn alýdy jáne esirtkige táýeldi adamdardyń sanyn azaıtýdy kózdeıdi.
«Keshendi jospardyń eń basty maqsaty – qoǵamnyń, azamattyq ınstıtýttar men barlyq bılik organdarynyń kúsh-jigerin osy máselege jumyldyrý»,-dep jazdy Memlekettik keńesshi.