Úkimet músheleri Jastar jylynda atqarylatyn is-sharalardy tanystyrdy
Eń aldymen Gúlshara Ábdiqalyqova jınalǵan qaýymǵa Elbasynyń «Áleýmettik qamqorlyq» jańa áleýmettik sharalaryn túsindirý boıynsha úkimettik toptyń mindetteri týraly habarlady. Ol bul jumys toby barǵan toǵyzynshy óńir ekenin atap ótti jáne barlyq óńirlerde halyq memlekettiń jańa áleýmettik saıasatyna túsinistikpen qarap, qoldaý bildiretinin aıtty.
- Elimizdiń Tuńǵysh Prezıdenti - Elbasy Nursultan Nazarbaev halyqqa arnaǵan Joldaýynda 2019 jyldy Jastar jyly dep jarııalaǵan bolatyn. Osyǵan oraı elimizde Jastar jylyn sapaly, abyroımen atqarý maqsatynda jol kartasy jobasy ázirlendi. Bul - ár sanattaǵy jastardyń qoldaý maqsatymen jasalǵan joba. Búgingi tańda jol kartasynyń jobasynda bes baǵyt bar, - dedi Úkimet basshysynyń orynbasary.
Gúlshara Ábdiqalyqovanyń aıtýynsha, birinshi baǵyt - eńbek etip júrgen jastardy baspanamen qamtamasyz etý. Nur-Sultan, Almaty men Shymkent qalalarynda jyl saıyn jas mamandarǵa arnalǵan 1 myńǵa jýyq arendalyq turǵyn úı turǵyzý josparda bar. Ol baspanalar kásiporyndarda, aýyl sharýashylyǵy men bıýdjettik mekemelerde, ǵylym salasynda jumys isteıtin jas mamandarǵa, isin endi bastaǵan kásipkerlerge arnalyp salynady.
Al, ekinshi baǵyt jastardy eńbekpen qamtýdy kózdeıdi. Osyǵan oraı «Jas kásipker» baǵdarlamasyn júzege asyrý qarastyrylǵan. Úsh jyldyń ishinde 60 myń jas azamat kásipkerlik negizderi boıynsha oqytylady. Aýyldaǵy jastarymyzǵa arnaıy 15 myń shaǵyn nesıe berý josparlanǵan. Al jańa bıznes ıdeıalardy júzege asyrý úshin 30 myńnan asa memlekettik granttar bólinedi.
Úshinshi baǵytta bilim berý jáne eriktiler uıymdaryn damytý jospary bar.
- Qazir «Jas maman» dep atalatyn baǵdarlama qolǵa alynyp otyr. Osy baǵdarlama arqyly suranysqa ıe 100 ındýstrıaldy jáne servıstik kásipter boıynsha mamandar daıyndalady. Bul baǵyttaǵy jumystar elimizdegi 20 aldyńǵy qatarly joǵary oqý oryny men 180 kolledj bazasynda júzege asyrylady. Úsh jyldyń ishinde elimizdiń barlyq aımaqtarynda 200 myń jas azamatty oqytyp shyǵarý kózdep otyrmyz, - dedi ol.
Sonymen qatar, Premer-Mınıstrdiń orynbasary tórtinshi baǵytta jastardyń áleýmettik belsendiligin damytý kózdeletindigin aıtty. Bul baǵytty «Jasyl el» qozǵalysynyń «Jasyl qala», «Jasyl aýyl» ortaq ulttyq jobasynyń aıasynda júzege asyrý qarastyrylyp otyr. Qurylys kompanııalarda stýdenttik qurylys otrıadtary úshin kvota bólinedi. 2025 jylǵa deıingi áskerı-patrıottyq baǵdarlama jáne taǵy da basqa baǵdarlamalar ázirlenedi. Besinshiden, jas otbasylardy densaýlyq pen áleýmettik ınklıýzıvti qoldaý týraly baǵyt bar.