Úkimet músheleri Arysta zardap shekkenderdiń jaǵdaıymen tanysty

ShYMKENT. QazAqparat - Búgin Shymkentke QR Eńbek jáne halyqty áleýmettik qorǵaý mınıstri Berdibek Saparbaev pen QR Densaýlyq saqtaý vıtse-mınıstri Kamaljan Nadyrov keldi, dep habarlaıdy QazAqparat tilshisi.

Úkimet músheleri Shymkent qalalyq klınıkalyq aýrýhanasyndaǵy apattan zardap shekkenderdiń jaǵdaılarymen tanysty.

«Snarıadtan jaraqat alyp, aýrýhanaǵa túsken 57 jastaǵy azamatshaǵa dárigerler shuǵyl túrde ota jasap, ómirin aman alyp qalǵan. Ol aýrýhanaǵa jetkizilgen kezde naýqas kóp qan joǵaltqan. Operatsııa óte kúrdeli bolyp, eki saǵatqa sozylǵan. Zardap shekken ekinshi naýqas 16 jasar azamat. Jas jigit qazir jansaqtaý bóliminde jatyr. Jaǵdaıy turaqty aýyr», - deıdi dárigerler.

Sondaı-aq, Úkimet músheleri qalalyq balalar aýrýhanasynda jatqan segiz jastaǵy balanyń jaǵdaıyn bildi. Oqys jaǵdaı kezinde balanyń basyna zaqym kelipti. Qan ketýdi joıý maqsatynda dárigerler balaǵa shuǵyl túrde ota jasaǵan.

Operatsııadan soń Almatydan arnaıy kelgen reanımatolog pen neırohırýrg balany qarap shyqty. Onyń da jaǵdaıy turaqty aýyr kúıinde qalýda.