Úkimet mindetti vaktsınatsııalaý týraly zań qabyldamaq – feık
Saıt Densaýlyq saqtaý mınıstrliginiń taraǵan aqparatqa qatysty pikirin keltiredi. Vedomstvo «Halyq densaýlyǵy jáne densaýlyq saqtaý júıesi týraly» kodekske sáıkes, medıtsınalyq qarsy kórsetilimderi joq, Qazaqstan Respýblıkasynyń aýmaǵynda júrgen adamdar ınfektsııalyq jáne parazıttik aýrýlarǵa qarsy mindetti profılaktıkalyq ekpelerdi alýy tıistigin, biraq osy Kodekstiń 77-babyna sáıkes azamattar vaktsınatsııadan bas tartýǵa quqyly ekendigin habarlaǵan.
«KVI-ge qarsy vaktsına – epıdemıologııalyq kórsetkishter boıynsha profılaktıkalyq egýler júrgiziletin ınfektsııalyq aýrýlar tizbesine engizilgen. Bul rette egýler vaktsına saldyratyn adamdardyń aqparattandyrylǵan kelisimimen ǵana júrgiziledi», - dep málim etedi mınıstrliktiń baspasóz qyzmeti.
Sonymen qatar, vedomstvo ókilderi búgingi tańda mindetti profılaktıkalyq egýler júrgiziletin aýrýlar tizbesin keńeıtý josparda joq ekenin atap ótti.
Al, qazir birden birneshe endemıkalyq emes elde tirkelip otyrǵan maımyl sheshegine keletin bolsaq, ázirge qazaqstandyqtar oǵan qarsy egilmeıdi.
«Aǵymdaǵy epıdemıologııalyq jaǵdaıdy jáne maımyl shesheginiń tirkelýin eskere otyryp, Dúnıejúzilik densaýlyq saqtaý uıymy osy ınfektsııaǵa qarsy jappaı vaktsınatsııa júrgizýdi usynbaǵanyn qosymsha habarlaımyz. Bul maımyl sheshegi aýrýynyń joǵary juqpaly ınfektsııalarǵa jatpaıtyndyǵymen baılanysty jáne ony juqtyrý úshin naýqaspen tyǵyz qarym-qatynas bolýy qajet», - dep túsindirdi mınıstrliktegiler.